Shillong: I maham wow ujor da ka Public Interest Litigation (PIL) yong u MDC ka Nongkrem u Hispreaching Son Shylla, hei yatoh wei sahkut ki Scheme MDC, da yarap sakhiat ko heiwa ynne da pyllait noh ya ki Work Order ynne ka sngi yong ka Khasi Hills Autonomous District Council hei yatoh waka Nongkrem Constituency.
Katkam i ong u Shylla, ynnin ka sngi, ka KHADC da pyllait ko hadooh 17 tylli ki Work Order yong ka MDC Scheme kiwa da poi hadooh T 1.12 klur kawa na ka Special Assistance Central Grant 2015-16.
U Shylla da pynbaad u wa ini i kset ya ki scheme MDC neibynta ka Nongkrem Constituency toh du i buit u CEM u Pynshngain N Syiem.
Iwa langoh won toh wa kini ki Work Order da saam hi da u CEM ha yungkrehkaam ka KHADC khlem pyntip ya u Shylla kam u MDC katwa ha kiwi tawan ki Constituency won da saam da jar jiar ki MDC.
“Neidaw wa u CEM da pyllait u ya ki Work Order, i thmu wow lai ujor cha ka yungbichaar da haap u sangeh chwa” da ong u Shylla ynne ka sngi.
Katkam i ong u Shylla ya kini ki Work Order da saam ha ki Waheh Chnong yong ki chnong kiwa haap ha ka thaiñ Nongkrem.
Iwa sñiaw langngoh won wa ka chithi na ka Secretary ka KHADC ka B. Basaiawmoit kawa dang pynpoi ha ka 24 tarik uni u bnai cha u Shylla, da phah wow pynkhreh ya ki schme ha ki Constituency wow mang poisa ya ki tangwa hadien ar sngi, da mih won ki Work Order ya ki scheme wa u Shylla ym pu em phah u.
U Shylla da ong u wa kani ka chithi kawa phah cha oo da ka Secretary da man ko thij kamwa phah u Secretary warim u Welljune Syiemlieh, wei hawa yaklam wa u CEM u Pynshngain N Syiem da ong u wa da e hukum u ya ka, khlem da lai katkam ki kyndon kawa ye u wanrah leh yei eh hadien wa bood.
Discussion about this post