Ka DC ka East Khasi Hills ha ka kyrwoh wa da phah, da ong wa hapoh ka District kiwa dang chah ktah da em ki kamwa 1300 ngut heiwa na kini 65% toh kiwa em ha ki thaw sor wa 35% ha ki thaw wa cha palatsor. Deiwa pynrap wa katni da wai chooh chooh ya kiwa boon ki kaam, kamtæ ym toh wow lehstiñ yow lait nei ku syndet biang kiwa yoh COVID-19 deiwa bood thij ya ki kyndon yada deiwa deiñ ya ki Mask wa ar-rtap lane da ki N95 Mask.
Da ong leh wa yow yada na ka la-ær wa le ka khlam da emkaam wow pynjoor yei boon kiwa yoh tika deiwa kdaw wa 82% na kiwa yoh COVID-19 toh kitu ki wym em yoh tika. Chooh chooh nadooh ka 01-07-21 hadooh ka 29-08-21, na ki 279 ngut kiwa yap na ka khlam hapoh ka District, 235 (85%) toh ki wym pu em yoh tika chisien leh, kamtæ da pynchlur ya ki wym pu em yoh tika wow lai pynche ya iwon iwon wa artatien ki wei wow chim smat ya i tika.
Da kyntu leh ya ki paidbah wow wan ki chakhmat wow chim yei bhah wa ar i tika hapoh i por wa da booh yow yoh yei yada wa pura.
Da ong leh wa em boon ki bru wa wan cha Hospital hadien palat chi tayaw wa yoh ki ya ki dak ki chin wa chitom heiwa da duna bha ka la-ær Oxygen hapoh i doh yong ki heiwa da poi cha u pood wa i kjut da joor bha i. Kamtæ da kyntu ya ki paidbah wow phah lai Test smat ki yow ye u yada nei ware wa i yap.
Da kdaw wa i leh stiñ dei wym bood kyndon ha ki yalang wym em wa pait, da wanrah ko yei ku biang kiwa yabi ya u khñiang ha kiwa boon ki bynta ka ri heiwa ki bru ym em wa deiñ Mask wei ym em leh ki ya ka Social Distancing deiwa yajngai uwi na uwi wei ini da man ko i wym em i kitkhlieh neiliang kiwa pynman ya kini ki yalang ha ki por wa da yaleh pyrchah yow ye u wow wai ya ka khayi pateiñ. Da ong leh wa ya kiwa leh pyrchah daw pynchitom ya ki.
Chooh da pyntip leh wa da sdang ya ka website www.ekh-covid.info yow ye u booddien ya kiwa dang chah ktah ha ka khlam, i e tika, kiwa da yap wa kiwi de hapoh ka District. Ki paidbah ye ki wow lai ha kani ka Website yow yoh ya ka yutip wa biang chaphang ki thaw wa em ki.
