Shillong: U symbood montri rangbah, u Prestone Tynsong da ong u wa ha u snem 2017-18 da em i kajia pood hapyrdi ka jylla Meghalaya wa Assam hadooh 15 sien, ha u snem 2018-19 won 17 sien katwa ha u snem 2019-20 da em hadooh 24 sien wei yeini da ong u hawa jubab yeiwa kylli u MLA ka Congress na Umroi, u George B Lyngdoh ha ka dorbar ynne ka sngi.
U Tynsong ong u wa ha u snem 2017-18 ha West Jaiñtia Hills da em 4 tylli i kajia, ha Ri-Bhoi 6 tylli katwa ha West Khasi Hills 4 tylli. Ha u snem 2018-19 ha West Jaiñtia Hills da em 6 tylli, ha Ri-Bhoi 4 tylli, ha West Khasi Hills 6 tylli wa ha West Garo Hills chisien. Katwa ha u snem 2019-20 ha West Jaiñtia Hills da em 10 tylli, ha Ri-Bhoi 8 tylli wa ha West Khasi Hills 6 tylli.
Chooh chooh u Tynsong da ong u wa ha ka yalang ki Chief Secretary ki ar jylla da rai wow ebor chwa cha ki Officer In-charge yong ki Police Station lada em iwon iwon i wym sñiawthooh hapyrdi ki ar jylla, wei lada ymye wow pynbait ya i kaam daw chimkti da ki Magistrate na waroh ar jylla wow bood won da ki DC wa SP chadooh ka kyrdan ki CS.
Hawa jubab yeiwa pynrap kylli da ong u wa ka sorkar Meghalaya da phah ko ya ka chithi cha u montri rangbah ka Assam wow pynbait sngi neibynta i yaklam ki montri rangbah hajrong kani ka kaam tangwa hadooh katni ympu ye wow pynmankaam ya ini i thmu.
Discussion about this post