U montri rangbah ka jylla, u Conrad K. Sangma ynnin da wai u ya ka PRIME Hub wa nyngkong dooh ha Songsak, East Garo Hills hei emlang u Advisor u Montri Rangbah u Thomas A Sangma, Govt. Chief Whip u Marcuise Marak, u MLA ka Siju-Rongara u Rakkam Sangma wa u MLA ka Rongjeng u Jim Sangma.
Hawa wai ya kani ka PRIME Hub ha Fables Spark Hills, kawa man ka thaw esikai wa pynlai da ka Bakdil, kawa man ka seiñ niam, u Conrad da ong u wa kani ka PRIME Hub toh kawa yahkhmat da ka sorkar wow esikai ya ki khynroo khyllood ka jylla ha ki sap wa ha rukom.
Da pyntip u wa ha ki snem wow wan daw sdang ya ki 50 tylli kam kini ki PRIME Hubs hapoh ka jylla.
Ka thong yong ka Promotion and Incubation of Market Driven Enterprise namo ka PRIME toh wow wailaad ya ki khynroo khyllood wow jied ki ya i esikai wa ki ye ki wow yoh myntoi næ wow imja ki.
Da yaroh u leh ya ka Bakdil wa da yarap ko ya ki SHG wow ye ki u e kreh cha ki paidbah ha ki 2500 tylli ki chnong ka Ri-loom Garo, heiwa da ong u leh wa i kreh chirup wa ka sorkar daw yarap bha i ya ki paidbah.
Da pynsñiaw u leh yei mynsien wa skem ya ka PRIME Hub hapoh i yahkhmat u Fr. Sunny Mavelil wa daw yoh myntoi bha ki khynroo khyllood ka Ri-loom Garo wow yoh kreh ki.
Da pyntip u leh wa em 25 lak ngut hapoh ka jylla kiwa em hapoh 20 snem i rta wei i kaamram ka sorkar toh wow thooh ki laad ki luti wow yoh kreh ki wei ka PRIME Hub u wanrah ko yeitæ i thmu.
