Ynne ka sngi ka yung krehkaam u Divisional Soil and Water Conservation, Jowai Territorial Division da lehwarom ko ya ka sngi wow yada ya ka rymaw namo ka World Environment Day, ha Moosyiem Shangpung heiwa u MLA ka Raliang, u Comingone Ymbon da man u kam u kongsan katwa u Dolloi ka Elaka Shangpung, u Chanki Langbang da man u kam u symbood kongsan.
U T. War uwa man kam u DS&WCO da pynlai u ya ka yalang heiwa da khana u ya ka parom wa da sdang ya ka lehwarom ya kani ka sngi wei da khana u wa barabor da pynman ya i thung dieñ wei ha kani ka kynti ka yung krehkaam u thung dieñ ko ha i thaw wa heh hadooh 185 Hectare.
U L. Sohlang, AS&WCO hawa e i klam da ong u wa ya kani ka sngi da lehwarom nadooh u 1974 wei ha uni u snem 2022 ka phang yong kani ka sngi toh ‘Only One Earth’ namo du kawi ka pyrthai.
Da ong u wa khnang wow im suk ha pyrthai, ka la’ær, i khyndaw wa ka um man ki kiwa emkaam bha ya waroh kiwa im ha pyrthai wei ki bru toh kiwa pynman bih ya ka wei katni kat dang mih ki sngi da sdang chit i pyrthai. Chooh chooh da ong u wa kam ki bru toh u chimkhia wow pynneh pynsah ya ka rymaw neibhah toh i kaamram ki bru wow yada ya ka pyrthai.
U Chanki Langbang hawa e i klam da ong u wa ka pyrthai man ko kam i yung wei khlem i yung ymye i wow im, katwa kamtæ emkaam wow thoohlaad i wow pynneh i ya ka khnang wow lait u chah tim ha ka pateiñ wow wan.
Da kyntu u ya waroh wow em i kitkhlieh wow sumaar ya ki tre dieñ wa thung khnang wow ye u pynneh wow yada ya ka rymaw.
Neiliang u Comingone Ymbon kam u kongsan, da ong u wa kani toh ka sngi kawa emkaam tam neibhah lyngba kani ka sngi pynkynmoo ko wow pynneh pynsah ya ka rymaw waroh talawiar soodong.
Da ong u wa ha ki thaw yong i ym emkaam wow thung ya ki dieñ tangwa emkaam wow pyndooh ya i thang loom neibhah ki dieñ pana mih ki wei i thang loom tynyap i ya ki dieñ, deiwa kyntu ya ka sorkar wow wanrah ya ki rukom krehkaam wow yada nei chah thang ki loom. Da kyntu u wow sñiawbha u pyntip cha ki waheh chnong lada chem ya kiwa thang loom khnang wow pynchitom ya ki.
Heiyatoh wa i thung dieñ ynne ka sngi, da ong u wa toh wa emkaam wow boodien ya ki dieñ wa thung, neibhah boonsien du hadien 4-5 bnai da wiar wa ki sla deiwa kyntu ya ki chnat sorkar wow booddien ki ya ki tre dieñ wa da thung khnang wow heh wow san ki.
Da ong u wa ka chnong Changpung ha ki por wa dadep da khooid ko neibhah wa em i bahkhlieh na ki khynnah wa ki paidbah tangwa ha kini ki sngi da sakhi wa da sdang tngit biang ko neibhah wa kam ki bru mylliñ i yei kaamram yong i, deiwa kyntu wow sdang biang u kreh wow pynneh pynsah ya i khooid i jngiar ka chnong.
Chooh chooh da kyntu u leh ya u Dolloi ka Elaka wow pyrkhat bha chwa wow ebor namo u e NOC ya ki karkhana Coke neibhah wa kini ki thaw pynmih ki ya ka la’ær wa tngit iwa ktah ya ki bru heiwa da sakhi ha East Jaiñtia da mih ki paidbah wow rah lama yong pyrchah ya kini ki karkhana.
Ha kani ka sngi, da yoh ya ki kyntien pdiang burom na u Waheh Chnong ka Moosyiem Shangpung, u Richardson Langbang uwa da e ya ki kyntien pdiang burom wa na ka E. Shylla ka AS&WCO da e ko ya ki kyntien khublei.
Da saam leh ya ki Prize cha kiwa jop ha ka Slogan Competition wei da e leh ya ki kyntien kular namo ka Pledge wow syndong hawa pymekaam ya ka um khlem pynsepai ya ka.
Da yoh leh i rwai na ki khynnah ka Presbyterian Higher Secondary School Shangpung wa na ka Chlem Yong ki Sur Tynre wei da pynman leh ya i thung dieñ.
