Shillong: I joor u slap ha kini ki kajiak sngi wa dadep da wanrah i yei chah ktah boon tylli ki chnong wa ki yung bru, tangwa ha ini waroh ym em i khlaad ki mynsien bru hanlada kiwa chong chnong wa da chah ktah em ki kamwa 16,000 ngut katwa ki chnong wa da chah ktah da em ki 21 tylli ha waroh kawi ka jylla nadooh ka 24 hadooh ka 28 tarik uni u bnai.
Yeini da ong u montri ka chnat Revenue and Disaster Management ka sorkar jylla, u Kyrmen Shylla deiwa pynrap wa ki manyung wa da chah ktah malum malæ em ki 4 tylli.
Chooh chooh da pyntip u wa ha ini i wan u slap da chah ktah leh ki sarok, ki hali wa ki thaw rep kamjooh leh i oor khyndaw.
U Kyrmen da ong u leh wa i chlai um wa i oor khyndaw da jia i ha ki 19 tylli ki chnong kiwa haap hapoh ka Mylliem wa ha Mawsynram C&RD Block.
