Ha ka 3 tarik uni u bnai, hajrong u Loom Tiniang u loom wa em naam em parom ka Syiem Latympang wa haap ha Laskein Block yong ka chnong Mowtyrchiah, neiliang ka seiñ kiwa chet ja-sngi ha ki skur wa tip kam ka All Jaintia Midday Meal Workers Union da pynman ko ka dorbar kut snem kawa tip kam ka 4th Annual General Meeting heiwa ki dkhot kani ka seiñ na man ki Block yong ka District da wan ki wow ya embyntalang.
Ya ka yalang da pynlai da ka Philoris Syngkon, President AJMWU Laskein Block heiwa da yoh i klam pdiang burom na ka Lamjingied Lapasam, General Secretary AJMDMWU Laksein Block, ki kyntien e mynsien ya ki dkhot ka seiñ, na u Satellite Lapasam, Waheh Chnong Mowtyrchiah neitæ i klam wa kyrpang na u Khroo Lamsalanki Pariat, Adviser AJMDMWU.
U Khroo Lamsalanki Pariat chim u leh ka laad wow khana hajrong ka parom tbian ka Syiem Latympang deiwa ong, i pyrtuid yong ka toh ka Latympang Shadap Maner hanla hei man kynthai leh em ko i khroo mynsien wow yahluti u pyntoh pyntne yaka hima yong ka wei wow yakhun leh ya kiwa leh pyrchah yaka.
Kamtæ deiwa chim yaka nongmuna ka Syiem Latympang pynchlur u yaki kynthai wow mih ki chakhmat wow yada yaka ri ka jaitbru kawa da chong sa’hir ha kini ki sngi, wa kynthup wow yada nei chong mylla sngi ha ki baar jylla hapoh i pynlai ki bru para, neitæ u pynkhlan yaka tipkur tipkha deiwa sdang na ki kynthai wym hoi u e bor ya kiwon kiwon kiwa kwah u pyndooh yei man kyntang i mankur mankha hapoh ka thaaiñ katwa sñiaw u da boon ki baar jylla wa yoh u booh dei kur Khasi næ kur Pnar ha kini ki sngi. Wei ini jia i toh wa boonsien kiwa choon chim kabu ki yei tlot ka kynthai.
Tæ kamwa wot ka sorkar bei leh katni da yaleh bha ko u e bor u pynkup bor yaki kynthai, kyntu u yaki kynthai wow mih chakhmat neibynta u yakhun wei yada yei hok.
Pynchlur haroh u yaki seiñ kur wow man kiwa pynrkhiñ heiyatoh wa kani ka kaam, neibhah ka kur ka jait toh kawa kyntang.
Ha kani ka sngi da wan ya embyntalang leh da ki bru ka sorkar wa toh u pait kyrpang ya ka PM Poshan hapoh ka jylla kiwa kynthup ya u Asoo Suchiang uwa pait ya ka PM Poshan Cell ha ka Directorate Shillong wa u O.B. Kurbah, Senior In-charge Consultant PM Poshan. Heiwa neiliang kini ki bru sorkar da khana pynsñiawthooh ki ya ki dkhot ka AJMDMWU chaphang ki bynta waphær yong ka PM Poshan.
Khaddooh chwa wow poi cha wakut yong kani ka dorbar yachemlang neiliang u Jerry Anderson Suting, President AJMDMWU Jaiñtia Hills da puræ u ya i krehkaam kyllum ka seiñ katwa ka Joyciful Lypon, Secretary AJMDMWU, Jaiñtia Hills da pynsñiaw ko yei sap i tap ka seiñ neibynta u snem 2021-22 neitæ i pynskem leh ya kiwa kitkaam wa thymme ka seiñ da ka Banalis Syiem, President ka Union of Cook Cum Helper PM Poshan Meghalaya kiwa kynthup yow Jerry Anderson Suting, President, ka Biiola Iakai, Vice-President, ka Joyciful Lypon, General Secretary, ka Arkini Lytan, Asst. Secretary waka Rimika Challam kam ka Treasurer.
Ya kani ka sngi da pynphooh pynphieñ wei pynchongchit leh ya kiwa wan sakhi da ki chaad wa da chimbynta da ki dkhot AJMDMWU yong ka Shangpung Unit wa ki dkhot ka Iooksi Unit.
Discussion about this post