U Kyrmen Shylla uwa man u kyrtong ka United Democratic Party (UDP) na Khliehriat Constituency wei kamjooh u Montri ka sorkar jylla da kob u wa ka UDP ha kani ka kynti daw jop ko boon ki MLA na Ri-loom Jaiñtia.
“Nga em O i kyrmen wa skem wa ha kani ka Election MLA kawa daw man ha ka 27 tarik u Thohlakhmi, ka UDP daw ye ko wow leh bha wei daw jop ko ha kiwa boon tylli ki Constituency,” da ong u Kyrmen Shylla hawa klam cha ki laad pathai khubor.
Uni u kyrtong ka UDP na Khliehriat da ong u wa ha man ki Constituency wa em ha Ri-loom Jaiñtia da em ka yaleh wei napyrdi ki 7 tylli ki Constituency, ha ki 5 næ 6 tylli ki Constituency ka yaleh man bait ko hapyrdi ki seiñ kiwa ya krehlang hapoh ka sorkar Meghalaya Democratic Alliance (MDA) iwa mut wa ka yaleh u man bait ko wa ka seiñ NPP.
“Hanla ha ka Election wa dep da jop i du 3 ngut na ka UDP tangwa ha kani ka kynti kyrmen i wow jop rap boon,” da ong u.
Hawa kylli hajrong i chah pynbaad wa joor ha ki paidbah pyrchah ya ka sorkar MDA da ong wa hanla ki pynbaad man ki kiwa boon tangwa ki paidbah da kylli ki leh kiyi wa yahkhmat ya ka sorkar wei ki paidbah hi sñiawthooh ki wei daw e ki i jubab wa biang.
Chooh chooh u Kyrmen da ong u wa ym toh iwa suk ya ka UDP kawa yoh yei jop du 6 næ 7 ngut ki MLA wow man kam kiwa yahkhmat ya ka sorkar wei ym man iwa suk ya ki 6 næ 7 ngut wow chim ki ya ka rai hajrong kiwon kiwon ki kaam lane wow lai pyrchah ya kitæ kiwa em 20 tam ki MLA.
“I emlang i ha ka sorkar khnang wow ye i wow wanrah ya ka roi ka paar wei wow e ya ki nia ki yutang neibynta wow pynbha ya ka jylla ka yong i, neibhah lada chong ha ka Liang Pyrchah hanla yoh ka laad wow pynyoo ya ki nia ki yutang tangwa ym em yumut neibhah wym em wa pdiang wei hawa kut daw chah kyntait bait, kamtæ deiwa em ha ka sorkar won i ye i wow leh.”
U Kyrmen da ong u wa waroh ki kyrtong kiwa yakhun pyrchah napoh ka Khliehriat toh ki bru wa yakhun suda wei kamtæ ym ye wow chim stiñ ya uwon uwon leh, najrong wa man ki ki kyrtong kiwa chlur tangwa hawa kut chong ha ki paidbah wow bichaar wei wow em i sñiawthooh ya kam uwon u kyrtong wow jied.
