Jowai: Ka yung krehkaam District Horticulture Officer, West Jaiñtia Hills Jowai, ynnin ka sngi da pynman ko ya ka yaaw pynyoo rong ya ki mar rep wa kynthup nadooh ki jhoor, ki soh, ki syntu wa kiwi kiwi ha madan ka skur Marian Hill Higher Secondary School Jowai heiwa u Wailadmiki Shylla, Chairman of Meghalaya Commission on Resource Mobilization ka sorkar jylla da man u kam u kongsan.
Ha kani ka sngi ka B. Majaw kawa man leh kam ka District Horticulture Officer hawa e yei klam lamphang da ong ko wa i thmu wow pynman ya kani ka yaw pynyoo rong toh wow pynchlur wei wow elaad ya ki warep wow pynyoo ki ya ki mar rep yong ki. Da ong ko leh wa ki warep wa kreh chitom u yoh ki ya u soh wa thiang lyngba ki Prize wa chakhmat wei da kyntu ko leh ya kiwi leh wow kreh chitom ki khnang wa katkam ka thong ka sorkar pyrdi ha u 2022 ka ri u man ko kawa dap baam.
Da kyntu ko leh ya ki warep wow pynyaar ki yei rukom rep, kam ha kini ki thaaiñ deiwa ar jait le jait ha i jooh i thaw khlem da ieh chrah ya ki.
U W. Marbaniang, District Agriculture da kyntu u wow kyruiñ cha i rep i riang neibhah wa wow baam ya ki mar wa rep hi ym pyn artatien ko ya ki wei emkaam leh wow pdiang yei rukom rep wa thymme deiwa chim kabu ya ki laad yarap wa e ka sorkar.
Neiliang u D.M. Wahlang uwa man kam u ADC West Jaiñtia Hills da pynchlur u wow pynthymme ya ki rukom rep wow yoh u pynmih ar chah man u snem kamwa da thmu ka sorkar deiwa pynrap leh wa kam ya u sapdok ymtoh u hun du wow rep wow dai cha yaaw wei wow liwan cha yung, tangwa emkaam leh wow rep ha i rukom wow ye u pynemkaam ya oo ha iwi tawon i rukom.
Da pyntip u leh wa ka sorkar da pynmih ko ya u number 1917 neibynta wow yarap ya ki warep wei uni u number emkaam u neibynta wow pynkit ya ki mar rep naki chnong cha ki yaaw.
Neiliang u Wailadmiki Shylla MLA ka 2-Jowai Constituency hawa e yei klam da kyntu ya ki warep wow man ki kiwa kreh chitom wei wow ngam yillu ha kawon kawon ka kaam rep khnang wa kat dang lai i por daw ye u pynboon chooh ya ka lap wa yoh ki.
Da kyntu u leh wow dam u beh wow rep ya u mar wa klam kiwi wa rap hoi dor neibhah lada waroh rep ki ya u jooh u mar man i iwa eh wow pynlai yaaw hei dor wa biang wei da kyntu u ya ki warep wow man ki kiwa yaichah wei wow ngam yillu wow pynjanai yei rukom rep yong ki.
Discussion about this post