Hajrong ka thong u pynsñiawthooh paidbah yei rukom im dei wym ktah yei rynyieñ ka bei rymaw, khnang wa iyi wa yoo i katni u neh ko haka pateiñ chakhmat, ynne ka sngi neiliang ka yung krehkaam yong u Range Forest Officer, Social Forestry Range, Shangpung da pynman ki yei pynsñiawthooh paidbah ha Rev. Anthony Crocket Memorial Hall, Shangpung Mission deiwa chimbynta ki khynnah skur ki VO ka chnong Shangpung ki manbei manpa wa kiwi.
Ha ka yalang wa pynlai da u M.C. Suchiang, Forester-1, da klam u leh hajrong i emkaam u pyndooh pyndam yei thang loom, thang khloo, da yoh leh i klam na u waheh chnong ka Shangpung Mission, u R.N. Born Suchiang. Katwa hajrong ka phang wa ong “Our Endeavour Today is for a better Tomorrow” da batai pynche da u L.D. Suiam, Assistant Engineer, Jowai Rural Distribution Division, MePDCL Jowai kam u bru chemphang.
Hawa klam hajrong ka phang “Our Endeavour Today is for a better Tomorrow” u L.D. Suiam da ong u i kreh monsñiawbha yong i deiwa pyrkhat neibynta ka rymaw daw man ko i myntoi ya ka mynried.
Wei kamwa ka rymaw chong ko hei bor yong u bru kamon u sumaar, u pynneh pynsah ya ka, katwa kamtæ emkaam yei rukom im wa man mar katjooh khnang wa ka rymaw ki soodong sookun u im ki, wei u bru leh u yoh myntoi u.
Da pynkynmoo haroh u hajrong i sdang yaka United Nations Climate Change Conference kawa da embynta da ki ri ka pyrthai dei thmu kammon u yakhun pyrchah yei kylla ka suiñbneiñ kawa booh hei maa yaka rymaw kamjooh ki bru wa im ha ka.
Neitæ da pynkynmoo u ya ki rai wada chim ha ki yalang wada pynman ha ki ri waphær waphær kiwa yatoh hajrong kammon u yada yaka rymaw wa kynthup nadooh ki khloo, ki um ki wah, ki sim ki doh wa ki jait wa im ha ka.
Chooh chooh yow yakhun pyrchah leh yei ku i chit nei kylla ka suiñbneiñ khamtam ha ki ri wa da ku chakhmat kawa jia lyngba nei pynmih tdem ki kharkhana wa kiwi de. Wei kamwa ka United Nations da booh thong ko ha u 2030 u jop heiyatoh kammon u pynduna yei chit, kamtæ da pynkynmoo haroh u ya ki thong wada chim da u Monntri Rangbahdooh ka sorkar India neibynta u yada ya ka rymaw.
Hawa pynkut yei pynche hajrong kammon u yada ya ka rymaw da kyntu u ya ki khynnah skur ki manbei manpa u yakrehlang wa ki thong ka United Nations, u im chi dur chi sur deiwa kyruiñ dien kammon ki waheh wa sian nachwa im ki. Wei yeini toh u sdang na samen samen deiwa pynrap leh u kiar pynemkaam Plastic deiwa pynemkaam da ki tiar wym ktah ya ka rymaw.
