Shillong: Ka ri Bangladesh da booh bhah ko ya ka poisa wow pynman ya ka lehkmen Bangladesh National Day ha ka 26 Wisu (March) ha Meghalaya ka wow man ka sien wa nyngkong hapoh ka jylla neibhah wa ka jylla man ko kawa kongsan bha ya ka ri Bangladesh wei yeini da pyntip da u Bangladesh Assistant High Commissioner to India, u Shah Mohammad Tanvir Monsur ynne ka sngi ha Shillong.
Hawa yaklam wa kiwa pathai khubor da ong u wa emkaam wow lehkmen ya ka sngi yong ka ri ha i rukom wa paka.
“Ka Assistant High Commission em ko ha Guwahati tangwa ha uni u snem ka sorkar Bangladesh da phah ko wow lehkmen ya kani ka sngi ha Shillong leh,” da ong u deiwa pynrap wa kani ka jooh ka lehkmen daw man ko ha Guwahati kamjooh leh ha Shillong.
Katkam wa ong u, ka jylla Meghalaya man ko ka bynta wa khroo ha ka thma Bangla wa 1971 kawa tip leh kam ka Liberation War in 1971.
Chooh chooh da ong u wa i daw pynman ya kani ka lehkmen toh wow pynkhlan ya i yatoh hapyrdi kini ki ar ri ha Shillong.
“Hapyrdi ka Meghalaya wa Bangladesh, em chiboon i khayi pateiñ nadooh u mooyong, u moo salin, u moochuni wa kiwi kiwi iwa man iwa emkaam wow pynkhlan yei yatoh hapyrdi ki ar ri”, da ong u.
Ha kani ka lehkmen daw lehwarom leh ya ki chipai India kiwa da dooh yei mynsien ha ka thma Bangla wa 1971, wei ka Bangladesh u leh pynman ko ya ka 26 Wisu kam ka sngi laitlooid yong ka.
Discussion about this post