Jowai: Ka Durga Puja kamwa man kiwi ki lehniam hapoh ka West Jaiñtia wa ka pyrthai hi waroh kawi da pynphær ya ka neidaw wa em ka khlam u COVID-19 katwa kamtæ da booh ya ki kyndon namo ki Standard Operating Procedure (SOP) wow bood hawa pyndep ya kani ka lehniam.
Hawa yaklam wa u DC ka West Jaiñtia Hills, u Garod LNS Dykes ynne ka sngi da pyntip u wa hajrong ki kyndon wa da booh ka sorkar jylla lyngba ka chnat Home (Political) Department heiyatoh wa ka lehniam Durga Puja da chong yalang leh wa ka Sarbajan “Durga Puja” Committee na Jowai wa u Doloi ka Elaka Nartiang ha ka 12 tarik uni u bnai heiwa da chim leh wow pynkrehkaam ya ki kattu katni ki kyndon.
Da pyntip u wa ha ka yalang da rai wow bood ya ki kyndon ka sorkar jylla, heiwa da rai leh wa hapoh ka District ya ka lehniam Durga Puja ym pynheh pynphooh ware ya ka wei ym em leh i pynngaam-um (Immersion) ya ki Blai tangwa daw pynngam du ya ka pachor wa kyrpang namo ka Decked Up Plantain Tree.
Chooh chooh da rai leh wa ym em kawon kawon ka lehkmen (Musical and Cultural Programme) wei ym pynheh ya ki sur lyngba ki tanghæng cha baar ka Mandir tangwa daw tem sur du hapoh Mandir heipor wa lehniam.
Da rai leh wow chah du 10 ngut ki bru heipor wa lai pyngngam-um wei ym em iwon iwon i lai kjat namo Procession heipor wa lai pynngam-um.
Neiliang u Dolloi ka Nartiang da ong u wa da pyntip paidbah wa ym em kawon kawon ka yalang paidbah (Gathering) wei da kyntu ya waroh wow chong ki ha yung wei ym chah leh ya ki bru na kiwi ki thaw ki dong wa ki chnong wow wan heipor Durga Puja.
Heijooh i por u Garod da pyntip u wa daw booh ya ki Magistrate wa ki pulit ha Jowai wa ha Nartiang khnang wow pynlai bait ya ka lehniam wei wow pyntikna wa ym em wa tyngkheiñ ya ki kyndon ka sorkar wei da pyntip u leh wa ha uni u snem da rai leh wow pynriam ya ka yung krehkaam u Deputy Commissioner ka District kam chibynta yong ka Durga Puja.
Khaddooh u Garod da pynsñiaw u yei mynsien wa kmen wa hapyrdi ka khlam COVID-19 ki lehniam hapoh ka District da lai bait ki nadooh ki Behdieñkhlam ki Raij, ka Beh Kymphui ka Raij Mynso wa kiwi kiwi da man ki kiwa jop heiwa da bood ki thij ya ki kyndon wa da booh ka yung krehkaam u Deputy Commissioner ka District wei da yooluti leh wa kani ka Durga Puja u man ko kawa lai bait hanlada ym man ko kamwa jooh man ha ki snem wa dadep khlem iwon iwon i jia wa sñiawsih wei yeini da ye u leh yeini toh du nei krehlang yong waroh kiwa embynta ha ini i kaam.
