Ka Meghalaya Energy Corporation Limited (MeECL) ha kani ka 24 tarik da sdang ko wow pyndait nyngkong ya ki Smart Electricity Meter deiwa booh nyngkong ha yung u montri ka chnat bordiñ u James K. Sangma wa ha i yung u Chairman-cum-Managing Director (CMD), ka MeCL u Arunkumar Kembhavi.
Kani ka Scheme Smart Meter Project toh kawa da kyrchaan poisa da ka Asian Development Bank (ADB).
Kini ki artylli ki Smart Meter kiwa da pyndait da chem toh kiwa krehkaam khlem i thut wei ka chnat da booh thong ko wow pyndait kamwa 2 lak tylli ki Meter ha kylleiñ ka Meghalaya hapoh kani ka Project.
Lyngba kini ki Smart Meter ye wow pait thij pa thij hadooh katwon i pynemkaam bordiñ, man ki leh kiwa ye u khana thij katwon poi ka bai bordiñ wei yaka bai bordiñ leh daw ye u su Online.
Ini daw yarap ko leh yaka chnat wow pynduna yei emkaam ki bru wow lai pait katwon poi ka bai bordiñ heiwa ya ki bru wa jooh leh ya ki Meter Reading daw pynemkaam ki cha kiwi ki kaam.
Ya ka bordiñ leh ye wow ah ha iwon iwon i por khlem da hap wow lai cha ki yung ki bru.
Kini ki Meter em ki ar jait, ki Prepaid wa Postpaid heiwa daw sdang nyngkong da ki Postpaid hapoh ka jylla.
Ka MeECL ye ko wow booddien yei krehkaam kini ki Meter ha iwon iwon i por kamjooh leh wa kammon man ki ha iwon iwon i por kam ka Volatage, i daw wa sih wa kiwi kiwi khlem da hap wow lai cha yung ki bru.
Kini ki Meter toh kiwa da chna yow khang yei tooh bordiñ wei lada em kiwa pyrchang wow tooh daw pyntip u Meter cha ka chnat heipor wa em wa pyrchang wow wai oo.
