Khliehriat: Ka khubor kawa da yoh ynnin i janmiet na u Justine Dkhar Local MLA Khliehriat Constituency, East Jaiñtia Hills District, lyngba u Namphrangmi L. Talang , General Secretary Southern Border Youth Welfare Association (SBYWA), EJH da ong u wa ka Bataw PHC da yoh noh ko ya ka Doctor wa pura kattu hadieñ ka sorkar lyngba ka Health & Family Welfare Dept da thung ko ya ka Dr. Banrikynti Khongñiang ha katai PHC.
Ini da pynkmen ko ya ka seiñ khamtam ya ki paidbah neibhah ka katai ka Bataw PHC kattu da dap 10 bnai wa da dooh Doctor ko.
Ka seiñ SBYWA da bood dien ko ya ini i kaam deiwa phah kot cha ka Montri R. Warjri (Health Dept) nadooh ka 12 Duyatra 2017 neibynta wow kyrpaad wow thung Doctor ha katai ka PHC.
Ha katai ka kot da thoh hadooh soo tylli ki phang kitæ toh wow thung Doctor, wow su ya ka bill light ka PHC kawa poi T. 10 lak tam, wow wai noh ya katai ka PHC wei wow pynmih post chooh chooh nadooh ki post Nurse, peon, chowkidar wa kiwi kiwi.
Kamtæ neiliang ka seiñ da e khublei wei da pynap ko yei sñiawngooh ya ka Montri ka Chait ka Khiah , DMHO Khliehriat khatam ya u J. Dkhar MLA, heiwa yatoh wa chimkhia ki u yaklam neibnyta wow thung Doctor ha katai ka PHC wei ka seiñ da kitbook ko ya kini ki heh sorkar wa u wa mihkhmat yow u yoh u yei chait i naang wow daw ye u e yei chakri ya ki paidbah.
Discussion about this post