Uwi na kiwa sdang ya ka seiñ All Jaiñtia Youth Welfare Organisation (AJYWO), Central Body, uwa man leh u Founding President yong ka, ynnin ka sngi da chnong-ngiah noh u na ka seiñ.
Ya ka AJYWO da sdang ya ka nadooh u snem 2010 weiwa u MH Dkhar da man u kam u President yong ka hadooh ynnin ka sngi.
Kam wow pynkynmoo heini, ka AJYWO da embynta ko ha kiwa boon ki kaam neibynta ka jylla Meghalaya wa ka ri-loom Jaiñtia hi leh waroh kawi.
Da jooh embynta ko ha i yaleh pyrchah ya i thmu ka sorkar jylla wow pynman ya ka Jowai kam ka Municipal Area iwa man pyrchah ya ka riti synchaar ka ri hapoh ka Sixth Schedule.
Chooh chooh ka seiñ da man ko kawa da pynkynmoo bait ya ki kaam u Khlawait ka Ri, u Kiang Nangbah ya ki paidbah ka Ri-loom Jaiñtia deiwa pynyieñ ko ya u mot sahnaam yong oo ha Khliehriat.
Heijooh i por da embynta ko leh wow yakhun ya ki bru wa sdang ya ki Company kiwa ym tipmit da ka RBI namo ki Non Banking Financial Institution hapoh ri-loom Jaiñtia.
Kamjooh leh ka seiñ hapoh i yahkhmat u MH Dkhar kam u President da embynta bha ko wa kiwi ki kaam wow yada ya ka jylla nei wan psiah ki bru na baar jylla.
Hawa yaklam wa u Wyrta, u Dkhar da ong u wa i kreh neibynta ka jaitbru wei neiliang yong oo u pteiñ bait i wei daw pteiñ u wow kdaw luti ya ka seiñ.
Hawa kylli won wa lada em u i thmu wow psiah cha ka kaam saiñ hima, neiliang u Dkhar da ong u wa i thmu toh neibynta u kreh yei bha i miat ka jaitbru wei ympu em u rai u hajrong ini (saiñ hima).
Ya u President wa thymme ka AJYWO Central Body da jied ya u Reachingson Siangshai.
