Ka District and Sessions Court, West Jaiñtia Hills kawa da sdang nadooh ka 27 tarik u Naiynñiaw 2013 ha kani ka kynti da yoh ko yaka yung krehkaam wa pura yong ka hi kawa em ha Khliehtyrshi, wei da wan u wai yaka ynne ka sngi da u Chief Justice ka Meghalaya High Court, u Sanjib Banerjee hei synran lang ki Judge ka Meghalaya High Court wa kynthup ya u Justice H.S. Thangkhiew, u Justice W. Diengdoh neitæ u Additional Judge, u Justice B. Bhattacharjee, u Registrar General ka Meghalaya High Court, E. Kharumnuid wa kiwi.
Ha kani ka sngi wai paidbah da emlang chirup u Symbood Montri Rangbah ka sorkar jylla, u Sñiawbhalang Dhar, u MLA ka thaaiñ u Wailadmiki Shylla, u Deputy Commissioner ka West Jaiñtia Hills, u B.S Sohliya, u Superintendent of Police, u C. Syrti kam kiwa chah khut sñiawbha deilang wa kiwi.
Ya kani ka yung bichaar da chna haka mang poisa wa Rs. 35,89,82,000 wei em ko soo mala iwa 90,631 sq.ft waroh, wei i thaw wa chna ya kani ka yung toh iwa heh 11.62 Acre wei em ko leh 7 tylli ki kamra chong bichaar namo ki Courtroom.
U Chief Justice Sanjib Banerjee hawa klam ha kani ka sngi ong u kani ka yung yieñ ko neibynta i hok u paidbah wei wow pynyoh leh i bichaar wa hok. Kamtæ i yoh ya jar jiar ka yung krehkaam wa pura hadien 10 snem man i sarong wa khroo.
Yooluti u leh wa yaki District Council Court haka jylla daw nang ye chooh chooh u pynbha pynmiat ki leh heiyatoh i chna kamjooh neibynta u pynyoh i chakri i bichaar wa hok cha u paidbah.
Heijooh i por e khublei u yaka sorkar jylla hajrong ki laad yarap wa pynyoh ko naki por chaki por.
U Symbood Montri Rangbah hawa klam yooluti u deiwa ye u wai ya kani ka yung krehkaam wa pura i rukom bichaar leh u man kawa lai bait wei rap bha chooh chooh.
Pynrap haroh u wa kani ka yung bichaar wa kam kani toh kawa 9 hapoh ka jylla wei hanla ka jylla Meghalaya toh kawa khian hapoh India leh, ong u wa neiliang u Chief Justice jooh yaroh u yaka sorkar hajrong i ye ko u pynbiang heiyatoh i rukom chna neibynta ki yung bichaar.
Discussion about this post