Ka skur Jingshai Mihngi Adventist Secondary School, Salini Colony, Mihmyntdu hadien i lai luti wa palat 15 snem neibynta u chakri paidbah heiyatoh wa i stat i tip deiwa krehkaam du nei yung wa chim wai, ynne ka sngi won da man ka sngi wow sah kynmoo pateiñ neibhah wada yoh ko yaka yungskur wa paka weiwa yoosuk wei da wan wai yaka da u MLA ka thaaiñ u Wailadmiki Shylla.
Hawa sdang ya kani ka skur da pynman ha i yung wa chim wai deiwa em kamwa 8 ngut ki khynnah skur wa 7 ngut kiwa sikai. Katwa nang lai ki por, ki khynnah skur da nang boon ki nalor wa ki kamra Class wada chna malu mala (Temporary) heithaw yong u P. Lyngdoh leh da jæd da pai ki tnom, kamtæ ha u snem 2019 ka School Managing Committee da paan yarap ko naka Maranatha Volunteers International, India.
“Heipor wa i paan yarap i naka Maranatha, paan i du neibynta ka kamra Class (Ordinary Classroom) wa kiwi ki pynsñiaw khlem da ong næ pan yaki ben, ki chuki, ki miej, ne wot u kær yaki soodong sookun, tangwa dap won i dei sñiawkmen wa khroo wow yoh kat kani ka yung Building wada biang lut i wym poi pyrkhat i,” ong u Pr. W. Lapadam, President Khasi Jaiñtia Conference Adventist.
Da ong wa hadien i paan yarap du hapoh 3 bnai da yoh ki yei jubab wa sñiawhun wa da kular u pynyoh hadooh 12 tylli ki Classroom tangwa emkaam u yoh yei thaw, neibhah wa i kreh leh u sdang wut wut.
U Wailadmiki Shylla hawa klam kam u kongsan ong u, ki bru hi wym neh i sah kynmoo ki yei yoosuk ka skur wa em, næ ya kiwi tawan, tangwa u neh i sah kynmoo yong ki du lada ki khynnah wa mih na kani ka skur poi ki chakhmat. Kamtæ kyntu u ya kiwa sikai wa ki khynnah skur u man kiwa kreh chitom.
“Kynmoo wa ya kani ka skur da chna lyngba i e yarap kiwa boon neibynta i bha ka mynried, kamtæ emkaam u kreh chitom wym pynsepai. Pyrkhat ya kitu ki bru wada kreh chitom neibynta u yoh e yarap cha kani ka skur kammon u sñiaw ki lada phi pynsepai phi,” ong u Wailadmiki hawa klam kyntu kyrsu ya kiwa pynlai kani ka skur.
Heijooh i por kular haroh u wa ya u sarok wow poi cha kani ka skur daw chna pyndep u hapoh ka samoi krehkam yong oo kam u MLA ka thaaiñ.
Ka Maranatha toh kawa em ha kiwa boon ki ri kawa e kyrchan yaka Balang Seventh-day Adventist, kam hei wow chna yaki yungmane, ki yungskur, ki thaw ri khonswet wa kiwi wa emkaam neibynta i roi i paar, wei ha India da sdang u kreh nadooh u snem 1999, pyntip u Vinish Wilson, Country Director yong ka Maranatha India hawa klam cha kiwa thoh khubor.
Hadooh kamwa man kattæ ha India la kamwa 2000 tylli ki jait chna wa da chna wa ka Maranatha da dep chna ko wa kynthup ki Community Centre, ki skur wei nalor kini pyntih thlu-um haroh ko. Ha uni u snem wa dep kamwa 136 tylli ki thlu-um da pyntih ko ha India wei sa kamwa 200 tylli ha uni u snem da pynkhreh u tih thlu-um ha waroh kawi ka ri.
Heiyatoh wa i mang wow chna yaka skur Jingshai Mihngi Adventist Secondary School khana u wa da khynjooh kamwa T. 1.8 klur.
Da emlang ha kani ka sngi u MDC ka thaaiñ u B. Chyrmang, Prof. M. Sungoh, Department of Education NEHU, u L.S. Lyngdoh, Joint Director of School Education & Literacy, West Jaiñtia Hills, Pr. Barnabas Zimik, President NE India Union, Pr. L.F. Lyngdoh, Former Union President, u Phermon Suchen waheh dong Salini Colony, u Abul Phawa waheh chnong Mihmyntdu, Principal Jingshai Mihngi Adventist L .Suchiang wa kiwi nalor kiwa sikai ki khynnah skur wa kiwa chah khut sñiawbha.
