Ynne ka sngi da wai ya ka yung Anganwadi Centre ha chnong Sahsniang Saitthad kawa da pynchna thymme lyngba ka Scheme ICDS deilang waka MGNREGA kawa da pynlait poisa T.6,00,370 deiwa yoh naka ICDS T. 1,00,000 katwa na ka MGNREGA T. 5,00,370.
Ha kani ka sngi da emlang ka sahep D. Iakai kawa man kam ka CDPO Laskein Block, u R. Dkhar uwa man kam u TA yong ka BDO Office Laskein Block wa u In-charge ya ka Sahsniang Circle, u M. Laloo, Block Coordinator, ka S. Pakyntein Assistant Block Coordinator, u P. Laloo Waheh Chnong, u Secretary Chnong, ki dkhot chnong wa ki wakreh kaam Anganwadi.
Da yoh leh yei klam pdiang burom na u waheh chnong uwa da khana wa ya kani ka ya yung da sdang u chna ha u snem 2003, wei ha kini ki snem wa da lai da chem yei eh neidaw wa da jæd da pra i, khamtam heipor lyiur por slap wym yoh ki khynnah u pynemkaam, kamtæ da e u i yaroh ya ka yung krehkaam yong ka ICDS wa ka yung krehkaam yong u BDO wa da chimkhia ki u pait u sylli ya iwa emkaam yong ka chnong.
Neiliang u R. Dkhar da e u yei yaraoh yaka VEC wa da ye ko wow pyndep ya kani ka yung heipor wa biang hanla em ka Lockdown. Da e yaroh u leh ya ka VEC wa da kreh bha ko heiyatoh wa ka Scheme 100 sngi, neibhah ha ki snem wa da lai ka Sahsniang Saitthad toh kawa duna bha hei pynkreh ya ka MGNREGA tangwa katni won lyngba i yakreh lang, da sdang ko u lai chakhmat, da ban joor u leh ya ki Executive Member yong ka chnong hanla em i eh i awri hapoh chnong hapoh thaw, ki kam kiwa yahkhmat toh u ya pynbait, u ya krehlang khnang wow lait kiwa chong chnong u dooh yei myntoi.
Neiliang yong ka D. Iakai, CDPO, da e ko ya i yaroh ya u R. Dkhar kamjooh leh ya u BDO yong ka Laskein Block neibhah kani toh ka Project wa nyngkong hapoh ka jylla Meghalaya waroh kawi wa da pynkrehlang (Convergence) ya ka ICDS wa ka MGNREGA yow pynchna ya ki yung warim yong ka Anganwadi. Da ong ko leh wa lyngba ini i sdang kamwa man kattæ, da boon tylli wa da yoh bor wow pynchna yeiwa sih wa pra ki Anganwadi Centre hapoh ka Laskein Block deiwa leh ya ini i jooh.
Ka CDPO da khana ko leh wa yaka poisa wa 1 lak toh kawa da slem bha tangwa nadooh ki sahep wa nachwa ym nood ki ka u pynkreh neibhah i emkaam wow lut wow pynchna man ko kawa boon wei heipor wa lai pait lant (Joint Inspection) wa u TA da chem sakhiat wa ka yung da boon iwa hap pynchna wei du ka poisa wa Sanctioned ka ICDS ym ye wow pynbha ya ka heiwa u TA da e yumut u wow leh noh daka Convergence wa ka MGNREGA lyngba ka VEC.
Chwa wow pynkut, da ah ya u Ribbon kam ka dak wow wai khnang yow ekti noh ka VEC ya ka yung cha ka wakreh Anganwadi.
I Anganwadi Centre warim
