Hadien 22 snem, ki ar chnong kitæ ka Pasadwar waka Lumpyngngad ha ka 31-12-22 da ye ki wow pynbait noh ya u pood kam chibynta wow lai cha u snem thymme deiwa em noh i yasuk hapyrdi kini ki ar chnong.
Neiliang ka Joint Action Committee Pasadwar-Lumpyngngad ha ka 31-12-22 da pynman ko ya ka yalang wow wanrah yei yasuk hapyrdi ka Dorbar Chnong Pasadwar waka Dorbar Chnong Lumpyngngad yow pynbait noh ya u pood u ang ha i thaw wa em ka Lumpyngngad Non-Government Lower Primary School heiwa ka Dorbar Chnong Pasadwar da e sñiawbha noh ko ya ini i thaw cha ka Dorbar Chnong Lumpyngngad.
Kamwa man, la kamwa 22 snem tam da em i yaphær yumut hapyrdi kini ki artylli ki chnong tangwa ha kani ka kynti deiwa yaklam ki waheh ki ar chnong da ye u pynbait noh ya waroh i sñiaw yaphær.
Hawa kut ka yalang, u Waheh Chnong ka Lumpyngngad da pynbna u wa da e sñiawbha kylliang deiwa e dei thoh cha ka Dorbar Chnong Pasadwar wa ye ki wow pynemkaam ya u sarok kari nadooh katai ka sngi. Kini ki ar chnong da rai ki wa ini toh i e sñiawbha snem thymme cha ki paaid ka chnong dei yasuk.
Ha kani ka yalang wa da pynman ha Upper Primary School Psadwar, u chnongknor wa da pynlai ya kani ka yalang toh u M. Amrynsong, General Secretary ka chnong Pasadwar uwa da pdiang sñiawbha ya waroh wei da yoh leh wow puræ chaphang kani ka yalang da u G.B. Syrti, General Secretary Chnong Lumpyngngad.
Hadien wa da ye u pynbait ya u pood u ang yong ka thaw wa em ka yung skur Lumpyngngad Non-Government Lower Primary School, da pteiñ ya ka yalang dei klam tbian na u F. Pamblang, Waheh Chnong Pasadwar wei da pynbood sa na u G. B. Syrti, General Secretary ka chnong Lumpyngngad neitæ won sa u C. Talang, Waheh Chnong Lumpyngngad.
Neilliang u Waheh Chnong ka Lumpyngngad da kyntu u leh ya kiwi ki chnong kiwa da yasih lane kiwa yachoon para jan chnong wow em noh ki i ya sñiawthooh kylliang khnang wa ki paidbah u yoh ki yei chongskuk.
Da pynkut ya ka yalang da ki kyntien e khublei na u B. Parang, Executive Member ka Dorbar Chnong Pasadwar.
