Ki khyllood, ki manbei ka chnong Jowai wa chong wa sah haki dong wa haap hapoh wa pait ka Jowai Municipal, ynne ka sngi da pynyoo ki hajrong rynsan yei sap i phong wa ye ki u leh heiyatoh wow pynwandur yaki that ki sula hei rukom waphær waphær du hadien 3 bnai wa da pyndep ki yei chah sikai wa dei mynkna haka North East Institute of Professional Studies (NeIPS) kawa em ha Mynthong Pohkseh, Jowai deiwa kyrchaan poisa ka Meghalaya State Skill Development Society chirup i krehlang ka Jowai Municipal Board.
Yeini i sap pynwandur da pynyoo ki deiwa pna sap hi ha idæ hi ya ki riam wa da sooh da pynwandur ki haka yalang pynkup burom ya kiwa da pyndep yei chah sikai wa da pynman ha Yungwalieh ka Tpep Pale, Jowai chirup i sakhi u MLA ka Jowai, u Wailadmiki Shylla, u Nominated MDC ka JHADC, u Octomewot Lamin, u Michel Thongni MD & CEO NeIPS, u Lambormi Suchen, Skill Development Officer ka West Jaiñtia Hills, u Lamkyrmen Pakma, Branch Manager Meghalaya Rural Bank Jowai branch, u F.G. Syngkon napoh ka chnat Industry wa kiwi.
Ha kani ka sngi u MLA chirup wa ki bor pynlai ka NeIPS da e kti haroh ki da ki kor soor wa ki Certificate cha waroh 50 ngut ki khyllood wa manbei kiwa da pyndep yei chah sikai kam chibynta u wailaad wai luti yaki yow yoh ki u sdang khih deiwa yieñ hei kjat yong ki hi.
U Wailadmiki Shylla hawa klam kam u kongsan pynsñiaw u yei kmen wow yoo yei sap i phong ki khyllood wa manbei deiwa ong, ini pynyoo ko wa ki Scheme sorkar wym em u sepai ki neibhah man ki kiwa jop katkam wa angnood ka sorkar.
Yaroh u leh ya kiwa chah sikai neibhah heipor wa tbian da ye ki u pynyoo hadooh katni, najrong wa du 3 bnai i por wym toh iwa suk u yoh sikai nadooh i batai wei sikai soor wei wow pynwandur.
Da pynrap haroh u wa i kaam soor, i pynwandur yaki that ki sula toh iwa dawa bha ha kini ki sngi, kamtæ kyntu u wow nang pynpliah chooh chooh ya idæ wei wow pynemkaam hok yei sap kamjooh ki tiar wa da e kti ha ki.
“I kaam soor, i pynwandur yaki that ki sula toh kawa da em nadooh ki por nachwa tangwa ki bru ha ka juk katni thooh ki yeiwa phær kamtæ emkaam u pyrkhat kammon u wanrah deiwa phær najrong kiwa da em chwa khnang yow ye u wanrah myntoi chooh chooh,” ong u Wailadmiki.
Ya kitu kiwa em yumut u sdang dei khih yong ki hi, kyntu u wow chim kabu ki yaki laad yarap lyngba ka chnat Industry, lyngba ki Bank najrong wow pyrkhat leh yaka yaaw ka haat heiwon i rukom u pynlai yaaw wa yaki maar.
Discussion about this post