Shillong: Ka jylla Meghalaya kawa da yooluti bha wow pynbna noh kam ka jylla kawa da khooid na u khñiang COVID-19 næ ka Green Zone, da sakhi pathan ko sa kawi kawa da chah ktah ha uni u khñiang namo wa man Positive ko ynne ka sngi iwa da pynman wow ku kiwa yoh khñiang ha kani ka jylla cha ka 13 ngut.
Hawa yaklam ynne ka sngi, u Symbood Montri Rangbah ka jylla, u Prestone Tynsong da ong u wa ka sorkar da pteiñ ko wow pait bniah wei wow Test ya waroh 181 ngut kiwa yajan wa ka yung uwa yoh nyngkong ya u COVID-19 ha ka jylla, wei hadien wa Test kawa le sien da chem wa kawi napyrdi kini em ko ya u COVID-19.
U Prestone da pyntip u wa ya kani ka bru da kyrriah noh cha ka COVID Care Center ha Shillong Civil Hospital, wei em ko hapyrdi i doh i pran wa khlan.
Da pyntip u leh wa kani ka bru da dep chong-kset ko 14 sngi nadooh ka 14 Naitung, heiwa da leh ya ka Test nyngkong ha ka 16 tarik u jooh u bnai wei ka bui (report) man ko Negative namo wym em yoh khñiang ko ha ini i por.
U Montri da kyntu u ya ki paidbah wa ymtoh u syir ki neibhah wa waroh kiwa yajan bha wa ka yung uwa da khlaad (Dr. Sailo) næ ki Primary Contact ym em u mih ki kat chawa em neidaw wa haap pyndep ki ya ka Quarantine wa 28 sngi.
U Prestone da pyntip u leh wa waroh ki Test da leh lut ha North Eastern Indira Gandhi Regional Institute of Health and Medical Sciences (NEIGHRIMS), wei hawa kylli chooh chooh da ong u wa kamwa man katni waroh ki district hapoh ka jylla Meghalaya toh kiwa da kynthup ha ka Green Zone, lait noh ya ka nongbah Shillong kawa da chah kynthup ha ka Orange Zone yong u COVID-19.
Discussion about this post