Ka Astronaut ka NASA na USA katni kawa em ha ka International Space Station (ISS) ka Christina Koch kawa 41 snem i rta myntu u liwan biang ko cha pyrthai hadien 328 sngi wa sah ko ha kani ka ISS.
Ka Christina da hær ko cha ka ISS na Baikonur Cosmodrome, Kazakhstan ha ka 14 Wisu (March) 2019 ha ka Soyuz MS-12 chirup wa ki ar ngut ki Astronaut, u Aleksey Ovchinin wa u Nick Hague.
Ka Christina da man ko kawa yahkhmat yong ka All-female Spacewalk namo wow mih du para kynthai napoh ka ISS wow lai ha haw-haw (Space) chirup wa ka Astronaut ka NASA, ka Jessica Meir wow kylliang ya i Battery wa da sih. Ya ini da leh ha u Naichiphaw 2019 wei da neh ki cha lait ka ISS kamwa 5 kynta tam.
Ka Christina myntu ka daw pynemkaam ko da ka Soyuz Capsule ka Russia wow mih liwan na ka ISS cha pyrthai chirup wa u Astronaut na Europe u Luca Parmitano wa u Cosmonaut ka Russia u Alexander Skvortsov.
Da antaad wa lada lai bait kamwa da booh, kani ka Capsule hadien wa krai ki Parachute u hiar suk ko ha Dzhezkazgan, Kazakhstan heipor kamwa 3:00 i sngi.
Ha uni u snem ka International Space Station daw dap ko 20 snem nadooh wa sdang krehkaam ko wow syuiñ ya ka pyrthai 16 sien chi sngi.
Discussion about this post