Jowai: Ka Iungwalieh toh ka yung yonglang ki khon kawon kawon ka dorbar chnong neibynta u yachemlang ha kiwa boon ki bynta, man ko ka yung wa e laad yaki wa chong chnong wow saiñ dur yaka mynstep ka man kawi ka chnong, u pynku yei sap ki khon ka chnong, ka thaw e sikai yei akor i burom, ka riti dustur natlor kiwi ki kaam wa bha wa yatoh wa i bha i miat ka chnong ka thaw, ka imlang sahlang.
Heiyatoh wa ini, ynne ka sngi da man ko ka sngi wa dap dei kmen yaka dorbar chnong Loompyrdi Iongpiah Jowai, neibhah wa hadien 33 tylli ki snem i lai luti wow chna yaka Iungwalieh yong ka, da ye wow pyndep pura yei chna wei da wai leh ya u moo sahnam deiwa sakhi lang kiwa boon ki paaid chong chnong nadooh ki manbei manpa, ki khynnah, ki khon khynroo, kiwa chah khut sñiawbha wa kiwi kiwi.
Ya u moo sahnam da wan wai da u dkhot ka chnong uwa heh rta dooh u Chaimon Pyrbot, uwa ha i jooh i por da e leh ya ki ktien kyrkhu kyrdoh wa kane ka Iungwalieh u man ko i kyrkhu wa khroo yaki khon ka chnong naki por chaki por.
U Hercules Toi hawa pynsñiaw yaka lai luti nadooh wa sdang hadooh wa kut i chna, da ong u wa ya i chna da leh kajiak pa kajiak haka Iungwalieh warim hi kawa da chna daka yung tin wei lada emkaam iyi iyi leh da pyndep heini hi khlem em i thut.
Da pyntip u leh wa i lut i sep waroh da poi ko kamwa T. 1 klur tam wei yaka poisa, ka chnong da yoh ko nei yarap na kiwa mihkhmat wa kynthup nadooh ki MP, MLA, MDC kiwa nachwa wa kiwa katni, nalor i e sñiawbha ka chnong wa kiwi ki bru wa pawkhmat, kamjooh leh naka poisa wa mih na ki Fete, ka yalehke Bamphalar wa kiwi.
Ha kani ka jooh ka sngi ka dorbar chnong da chim ko leh yaka kabu wow pynkup burom ya kiwa mihkhmat kiwa da yarap wei kamjooh leh yaki dkhot ka chnong kiwa embynta wow chna yaka Iungwalieh.
Da pynchongchit chooh chooh ya kani ka sngi da ki chaad ki rwai kiwa da chimbynta da ki khon ka chnong.
Discussion about this post