Ka Indian Coast Guard (ICG) sa chisien da pyndep ko ya ka Search and Rescue Operation duriaw deiwa chem ya kawi ka lieñ-khwe (Fishing Boat) na Tamil Nadu, ka Mercedes kamwa 1100 KM (590 miles) na rood duriaw ka Goa wei i sdang thooh ya kani ka lieñ da sdang i nadooh ka 24 tarik uni u bnai.
Kani ka lieñ-khwe da mih ko cha duriaw wow khwe nadooh ka 6 tarik chirup wa ki 11 ngut kiwa na West Kerala neibynta 30 sngi deiwa mih na Thengapattnam Fishing Harbour ha Tamil Nadu.
Neiliang ki bor ka Tamil Nadu Fisheries ha ka 24 tarik da pyntip ki ki lieñ-khwe kiwa em ha i jooh i bynta (wa em ka Mercedes) da yoo ki ya ki bynta ka lieñ wa pær (debris) wei da mutdur wa da ngam ka lieñ Mercedes.
Ka Maritime Rescue Co-ordination Center (MRCC) yong ka Indian Coast Guard ha Mumbai da pynkrehkaam ko ya ka International Safety Net wow pyntip ya kiwi ki lieñ wa ki jhaad lada yoo ki ya ka lieñ wa wiar wei da phah leh ya ka jhaad ICGS Samudra Prahari kamjooh ki lieñsuiñ wow thooh ya ka.
Hadien soo sngi nadooh wa thooh ya ka, da chem ya kani ka lieñ kamwa 200 miles (370 kilometers) na Lakshadweep Islands da ka lieñsuiñ ICG Dornier wei ka jhaad ka ICGS Samudra Prahari da lai e yarap ko ya kani ka lieñ heiwa da ye wow pyntikna wa waroh ki 11 ngut man ki kiwa chait.
Katni da yah biang ya kani ka lieñ wow liwan ko wei da yooluti wow poi niang ko ha Thengapattnam Fishing Harbour ha ka 3 Naisan 21.
Ka ICG neipor chreipor da embynta ko hei wow thooh wei wow e yarap ya ki lieñ wa ki jhaad ha duriaw wei da ye ko leh wow pynlait-im hadooh 10,000 ngut ki bru na ki 3400 tylli ki Mission wa da kreh ko wow thooh wei wow e yarap ya ki lieñ wa ki jhaad.
