Jowai : Ha ka 30 Khonchonglad (November) 2011 da em i wi i jia ha Jowai heiwa u wi u bru wa tip kam u Small Phawa da chah kynnoh u wa ksohbor u ya ka wi ka khynnah wa dang hapoh 18 snem (Minor) hapoh ka kari u heipor 6:30 i janmiet ha jan ka yingkeiñ wa em ha Treiongriang.
Neiliang u Small kat kam wa da e sabut ha ka mukotduma da ong u wa oo wa kani ka kynthai toh kiwa ya maya (chi chan) la 6 bnai heipor wa chah kynnoh u wa ksohbor u ka wei dang dep wan thied tiar ki na Yaw da ka kari yong oo.
Katkam ka Medical Report won da chem wa da jngem ki skep wa i khliekyrsu kani ka khynnah na tidiang wei em leh ki dak wa da chah lehbor ko na i bynta kynthai.
Kamtæ kani ka mukotduma da poi ha kiwa boon ki yungbichaar heiwa ha 26.02.15 ha ka yungbichaar Fast Track Court u wa bichaar da e u ka rai wa ym ye kiwa kynnoh wow pynsakhiat wa ksohbor u Small ya katai ka khynnah wei da pynjop ya oo hapoh ka Section 232 CrPc.
Neiliang kiwa ha yung yong ka da lai pyrchah (appeal) ki ya kani ka rai ka Fast Track Court wei da sdang biang ya kani ka mukotduma.
Ynne ka 27 tarik ha ka yungbichaar ka Session Judge ha Jowai ka kong B. Giri da rai ko wa u Small Phawa da ksohbor u ya kani ka khynnah wa dang hapoh 18 snem.
Hapoh ka kyndon IC 376 da phah kset ya oo 10 snem (Rigorous Imprisonment) kamjooh wow su kuna u T. 5000 wei lada ym su u ya kani ka kuna daw chah kset biang u sa chisnem hadien wada kset ya oo 10 snem.
Katwa ya kani ka khynnah u yoh ko T. 1 Lak na ka Meghalaya Victim Compensation Scheme 2014 ka wow su da ka District Legal Service Authority of West Jaiñtia Hills hapoh 90 sngi.
Discussion about this post