Ynne ka sngi da wan wai ya ka yung kasari namo ka Court Building of the Sub Divisional Court Amlarem da u Chief Justice ka Meghalaya High Court, u Biswanath Somadder hei emlang ki montri ka sorkar jylla, u James PK Sangma, u Lahkmen Rymbui wa u Justice HS Thangkiew, Justice RV More wa u Justice W. Diengdoh.
Ya ka yung kasari ha Amlarem da sdang ha ka 12 Kmaichonglad 2014 wei ya u mooyurim wow chna ya kani ka yung thymme yong ka kasari da booh ha u Naitung 2017 wei ynne won da ye u wai noh ya ka.
U Lahkmen hawa e yei klam da ong u wa kani ka sngi toh ka wow sahkynmoo bha beibhah wa da ye u wai ya kani ka yung ka wow pynsuk ya ki paidbah wei ya ini i yung da ye u pyndep toh du nei kreh chitom ka Meghalaya High Court, da kyrmen u leh wa emkaam ya waroh u man kiwa yakrehlang chirup ha kani ka kasari.
Neiliang u James da ong u wa i em kani ka yung kasari ha ini i thaw e mynsien i ya ki paidbah ka thaaiñ khamtam heiyatoh wa ki kaam mukotduma yong ki.
U Chief Justice Biswanath Somadder da ong u wa kani toh u man ko ka thaw wa khaddooh wow wan wow dawa yei hok tangwa chwa ini emkaam wow pynbait ya ki kaam dei sñiawthooh mar kylliang wei ym man u man iwa miat wow yaleh ya ki mukotduma khari khari.
Da ong u wa ka Legal Aid da booh ya ka neibynta ki bru kiwa ymye wow su ya ki muktiar wei ki DLSA u pyntikna ki wa yoh yarap ki bru khamtam ki kynthai wa ki khynnah.
Ya kani ka sngi da pynphooh da ki chaad wa ki rwai na ki khynnah skur kamjooh leh na ki muktiar ka Jowai Bar Association.
