Hadien chi snem wa chah rahbor ka khynnah kynthai na Rajabala, West Garo Hills, ki pulit da yoh ki wow pynlait ka na Delhi deiwa ya krehlang wa ka Delhi Police. Uwa emkti wow leh yeini i kaam da tip kam u Atowar Hussain uwa khut siñ kam u Rahul heiwa da yoh leh wow kem ya oo wei da phah kset patok oo 14 sngi.
Katkam wa pyntip u SP ka West Garo Hills, u Abraham T. Sangma, ya kani ka khynnah da chem ka na Batla House, South Delhi, deiwa ya krehlang ki pulit ka Tura Women’s Police, Delhi Police wa ka Special Police Unit for the Northeastern Region (SPUNER).
Ka FIR wa wiar kani ka khynnah da booh ha ka 20 tarik u October 2024 da kiwa ha-yung ha-sem ko wei da thooh ya uni u bru wa suba wa rahbor ya kani ka khynnah da boon bnai wei mar ya tip wa em ki ha Delhi da lai cha ini i thaw ha ka 24 tarik wei ha ka 25 tarik da ye wow chem ki wei da wanrah ki cha Tura.
Nyngkong da Register kam ka Kidnapping Case, tangwa kattæ won da pynngat hapoh ki kyndon ka aiñ Protection of Children from Sexual Offences (POCSO) Act, hadien wa da pyntikna wa kani ka khynnah heipor wa chah rahbor ko em ko hapoh 18 snem i rta.
Katkam ka khubor wa da yoh, kani ka khynnah manda liwan ko da kha ko yei khon kynthai ha Tura Civil Hospital hei step ka 26 tarik.
Ka khubor wa da yoh da ong wa ya kani ka khynnah da rah cha Delhi da u Atowar Hussain, uwa chong chnong ka Rajabala. Wei hadien boon bnai da yoh ko wow Phone cha ka bei u pa ko deiwa paan yarap wa chah ksoh ko ha Delhi tangwa ym tip ko heiwon i thaw.
Deiwa yarap ka seiñ ki Garo wa em ha Delhi wa tip kam ka ACHIK da sdang wow thooh ya kani ka khynnah deiwa ya krehlang ka Tura Women’s Police deilang kiwa ha-yung ha-sem kiwa dapoi ha Delhi ha ka 21 tarik wei hadien boon sngi da chem wa em ko ha Batla House heiwa da pyntip cha ki pulit ka Meghalaya.
Kamtæ ha ka 24 tarik da yoh wow kem ya u Hussain wei da yoh leh wow pynlait ya kani ka khynnah wei da wanrah ki cha Tura ha ka 26 tarik.
Ka takit dang lai ko chakhmat yow pyntikna uyi u pa i khon kani ka khynnah.
Discussion about this post