Nadooh ki sngi wa pynkhreh yaka Election wow jied ya u President wa thymme ka USA, u President wa katni u Donald Trump da sdang u wow pyrchah yei rukom thap Vote deiwa phah da ki Postal Ballot namo ki Vote wa da dep thap ki bru kiwa da phah won lyngba ka Post Office deiwa kam u wa daw em boon i niaw thok yaki Vote wa i leh thok deiwa leh ya ini heiwa da pynchlur u ya kiwa kyrchaan ya oo wow lai ki cha ki Polling Station hi yow thap ya ki Vote.
Ya ki Postal Ballot da leh neidaw wow yada naka khlam COVID-19 heiwa ka USA toh ka ri wa chah ktah dooh hapoh pyrthai.
Nadooh ki sngi chwa wow niaw Vote won da pynbaad u Trump wa da chem ya ki Postal Ballot kiwa da noh cha dooid cha liar kiwa thap cha oo wei kini ki pynbaad wa boon jait da pteiñ i hadooh ka sngi niaw Vote hadooh wa phah u wow dam noh u niaw ya ki Vote hadien wa sdang u wow tam ki Vote ya uwa leh pyrchah ya oo u Joe Biden hanla dang em ki Vote kiwa ym pu em dep niaw khamtam ki Postal Ballot.
Katwa dang niaw ya ki Vote, u Joe Biden da sdang u wow tam ya u Donald Trump uwa da pteiñ wow pynbaad wa da em i leh thok wow niaw Vote heiwa hadien wa kut ka niaw Vote, u Biden da tam u da 70 lak tylli ki Vote kamjooh leh hadien wa thap yaki Electoral Vote kiwa emkaam wow yoh yow man kam uwa jop haka Election, u Joe Biden da tam u yaki 270 tylli ki Vote wa emkaam wow jop.
Wot hadien ini, u Donlad Trump ym bien u wow pdiang wa rem u wei da yaleh u da ki phaw tylli ki mukotduma ha kylleiñ ki yung bichaar ka USA heiwa ha waroh ym ye ki wow wanrah yei sabut wa em sakhiat i leh thok haka Election lait noh yei pynbaad hi-eh, kamtæ da rem lut kini ki mukotduma.
Hadien ini da poi noh sa i bynta wa khaddooh wa da leh ynne ka sngi heiwa u Vice President wa katni u Mike Pence da man i kamram yong oo wow pynsakhiat yaki Electoral Votes hapoh ka yung dorbar ka ri kawa tip leh kam ka Capitol Building heiwa u Donald Trump da pynchlur u ya u Mike Pence wow kyntait ya kini ki Vote wei yow pynbna ya oo kam uwa jop ha kani ka Election.
Hapyrdi wa dang pynman yaka dorbar ka ri wei da yatai hajrong ka Election, neiliang u Donald Trump da pynchlur u ya kiwa kyrchaan ya oo wow lai toor ki cha ka yung dorbar (Capitol Building) heiwa da leh ki ya ini wei da psiah yabor ki cha ka yung dorbar hadooh wa da hap wow pynmih ya kiwa mihkhmat paidbah napoh ka dorbar neidaw wa da poi kiwa kyrchaan ya u Trump hadooh ka kamra wa pynman dorbar heiwa da chong ki hadooh ka chuki ka Speaker, da psiah ki cha ki kamra krehkaam wei da em leh kiwa tooh yaki tiar ki tar. Ha ini i jia da em kawi kawa da chah siat yap wei da kem ya ki 52 ngut na ki spah ngut kiwa psiah yabor.
Hadien wa da ye wow pynjai jai wei wow pynmih ya kini kiwa kyrchaan ya u Donald Trump, u Vice President yong u Trump da yoh u wow wan hapoh ka yung dorbar yow pynsakhiat yaka Electoral Vote heiwa da pynbna khaddooh ya u Joe Biden kam u President thymme ka USA deiwa yoh u 306 Vote katwa u Donald Trump kam uwa rem deiwa yoh 232.
Hapyrdi ini waroh wa jia, ka Facebook waka Twitter da pyndam ki chipor yaki Account u Donald Trump hadooh wa Delete ki ya kiwa thoh u Trump kiwa pynchongchit bru.
Hawa khaddooh u Donald Trump da pdiang u yei rem deiwa ong leh heijooh i por daw yaleh u wow booddien ya kani ka kaam yow pynsakhiat yei leh thok ha kani ka Election wei i chimkti u President wa thymme u man ko kawa lai bait.
Ya u President wa thymme ka USA u Joe Biden daw pynsmai noh haka 20 tarik uni u bnai.
