Shillong: Hadien wa da pynkrehkaam ya ka Aquaculture Mission wow pynchlur wow psan dahkha la kattu katni snem nachwa, ka sorkar jylla da rai ko wow pynchlur won ko sa i psan sniang.
Ka dhab ki Montri yong ka sorkar MUA-II ha ka yalang kawa pynman ynne ka sngi da pdiang ko wow pynchlur ya ki paidbah kiwa psan mrad kahmtam kiwa ri sniang hapoh ka jylla wei yeini u sdang nadooh uni u snem.
Ha uni u snem ka sorkar da booh thong ko hadooh 50,000 ngut ki bru wow yoh myntoi na i psan sniang wa kiwi ki mrad kam ki syiar, masi, wa ki jait sim. Ya kani da pyntip da u Montri Rangbah ka jylla u Dr. Mukul Sangma hadien wa kut ka yalang ki Montri.
Ka sorkar da mang poisa ko leh T. 217 Klur ha uni u snem neibynta kani ka kaam, wei da booh thong wow pynkrehkaam ya kani ka thong hapoh san snem hadooh u snem 2022. Da ong u leh wa ha kini ki san snem ka sorkar da mang poisa ko hadooh T. 1088.9 Klur neibynta ki kaam ri mrad.
Yow pyllai ka sorkar ya ini waroh da sdang ko da ka Meghalaya Piggery and Livestock Development Society ka wow pait wow pynkreh ya kani ka kaam.
U Montri Rangbah da ong u wa neibynta kiwa dooh ka sorkar u yarap ko da ka ‘Grant’ katwa ya kiwa leh ya ki kaam khayi daw yarap da ka ram lyngba ki bank.
Katkam i pyntip u Montri Rangbah i thmu wow pynroi ya ka kaam psan sniang toh wa neidaw wa hapoh ka jylla toh kawa khlan baam doh sniang wei i dawa yei doh sniang dang joor i hapoh ka jylla hadooh wa haap wow wanrah nadooh ka baarjylla.
Da ong u wa i thmu toh wow kyntu ya i yoh i kot yong kiwa rep wow yoh laad ki sa kawi ka khih kamjooh lada yoh khih ki ha chnong ki ym wan tia ki cha sor kawa da man wa da khynñia chwa.
Hei yatoh won wa ka Aquaculture Mission da ong u wa ym man ko kawa sepai lada jied ka sorkar wow kyntu wow ri ya kiwi ki ri mrad wei da pynksan u yeini deiwa ong wa hadooh kiwa em thaw wa khian leh da kwah ki wow chna nan psan dakha wei neiliang kiwa wan khwe leh da yoh poisa ki tre nan.
Discussion about this post