Kam chibynta wow lehkmen, u tipmit wei wow pynyoo pyrthai yei kreh chitom kiwa chong chnong wa em cha ka thaaiñ palatsor ka jylla Meghalaya kiwa da pynku wei da pynkylla dur ya ki chnong ki thaw wei kamjooh i khih i khan ha kiwa boon ki liang, da pynman ya ka yalang deiwa emlang kiwa emkti ha ini i kaam ha State Convention Centre, Shillong.
Ya kani ka yalang da pynman yow yoh u yachem lang kiwa chong chnong na kylleiñ ka jylla yow yoh ki wow e buit kylliang kammon da leh ki yow yoh yei jop, kammon da pynlai ki ya ki kaam poisa poilaiñ kamjooh kammon pynlai ki ya ka seiñ yong ki hapoh ki chnong ki thaw.
Ha kani ka sngi da em waroh 12 tylli ki seiñ kamjooh ki bru samen kiwa da chah pynkup burom wei da e laad leh ya ki wow klam ki yow khana ya ki parom wa poi ki chei jop.
Neiliang u kongsan ha kani ka sngi, u Dr. Vijay Kumar D., Commissioner & Secretary ka sorkar Meghalaya, da pynsñiaw u yei kmen wow yoh u emlang wei wow ap yeiwa khana kini kiwa da jop ha ki kaam wa da leh ki deiwa khana leh wa wot u Prime Minister ka India, u Narendra Modi hawa wan u cha Shillong ha ka 18 tarik neiliang ka sorkar da pynyoo ko cha oo ya ini i kreh wa bha wa da leh da kiwa chong chnong ka Meghalaya. Heiwa u Prime Minister leh da yaroh u ya ini i ya krehlang kiwa chong chnong.
Ha ki chnong ki thaw neiliang ka sorkar da em ka Meghalaya Basin Management Agency (MBMA) kiwa da yakreh bait wa ki bru yow khana leh cha ka pyrthai ya ini wa da jop i kreh.
U Kumar da khana u leh wa ki kreh wa da yoh poisa na baar kiwa tip kam ki Externally Aided Project kiwa da pynkrehkaam hapoh ka Meghalaya toh kiwa da yoh yaroh bha. Da e nongmuna u ya ka Megha-LAMP Project kawa da toh u kut noh ha uni u bnai, tangwa ka sorkar India da pynyinsur ko ya kani sa ar snem deiwa e sa USD 20 Million yow pynbha pynmiat chooh chooh yei kreh. Hapoh ini da ye wow chalan cha baar ri ya u soh khontara uwa da tip pyrtuid kam u Khasi Mandarin heiwa hei sien wa nyngkong da phah ya uni u soh cha Dubai wei da dai ya oo ha LuLu Hypermarket kani ka chnong. Wei yeini da leh waroh da ka Ganga Integrated Village Cooperative Society (IVCS) na South Garo Hills deiwa yarap ka sorkar du kattu katni donhi iwa pynyoo yei stat kiwi chong chnong.
Ya uni u soh da phah leh sa 2 Ton cha ka ri Doha wa Bahrain hadien wa man iwa jop i chalan cha Dubai.
Da emlang ha kani ka yalang wa u Gunanka DB, Joint Secretary, ka sorkar Meghalaya wa Additional Project Director ka Community Led Landscape Management Project (CLLMP) deilang wa kiwi de kiwa mihkhmat na ki chnat waphær waphær ka sorkar kamjooh kiwa chong chnong na ki chnong wa boon.
Ya kani ka yalang da pynman da ka IFAD kawa kyrchaan ya ka Megha-LAMP Project wa man kyrpang du ya kiwa chong chnong deiwa yarap ka Meghalaya Basin Management Agency.
