Jowai : Ka Basin Development Unit Jowai ha kini ki tayaw wa da dep da e sikai ki ya ki khynnah khynroo na Darrang wa Shnongpdeng heiwa kammon u tip ki u chondur.
Da dep esikai leh ya ki hei yatoh u klam pharæng (English) wa dkhar (Hindi) ha English and Foreign Languages University (EFLU), NEHU, Shillong.
I thmu wow esikai ya ki khynroo khyllood toh wow ye ki u pdiang ya kiwa uiñsawari wa wan na kylleiñ, kam ka dak wow pynsuk ya ki hawa wanke ki cha kini ki chnong.
U wa chondur wa da naam u Rohit Suri, da wan u nadooh ka nongbah New Delhi wow e sikai chondur ya ki khynroo khyllood wei yow pynman leh ya ka Daarang kam wa thaw wa ye kiwa dang dep bia wow wan chondur ki. Da jied ya ka Daarang neibhah man ko ka thaw wa khooid kamjooh wa biang bha wow chondur. U Rohit da e sikai nadooh wow leh make-up kamjooh wow pynkhreh ya ki tiar ki tar chondur wa boon jait.
I naam ka Shnongpdeng da bna kylleiñ ka pyrthai wei da sakhi leh yei wan yohkjat wot da ka syiem na ka ri Thailand daw pyrchang leh u pynpawnaam leh sa ya ka Daarang.
Ki bor district da pyntip ki leh wa ka chnong Darrang toh sa kawi ka thaw kawa ye ki paitbah u lai uiñke ya ka wow wai ha uni u bnai Thohlakhmi (February) wow wan.
Da em leh i yaklam wa ka Polo Orchid wow chna ya ki yungsah ha kani ka chnong, heiwa ka um man ko kawa jngiar bha kamwa man ha Shnongpdeng.
Hadooh katni da dep pyndait 30 tylli ki Solar Light ha Shnongpdeng wei daw booh chooh ya kini ha ki bnai wow wan.
Discussion about this post