Ka Scheme saam um ha Jowai na ka Wah Mynngot, ya kawa tip kam ka Renovation of Jowai Water Supply Scheme da man ko ka kaam wa sahteiñ la kamwa arphaw snem heiwa da mang wow kreh ya ka nadooh u snem 2003, tangwa ynne ka sngi da man ko ka sngi wow sahkynmoo wa da ye wow wai paidbah noh ya ka haka yalang wa pynman ha Oorkhka, PHE Khimmusniang, Jowai.
Ha kani ka sngi da wan wai ya kani ka Scheme da u Montri ka chnat PHE, u Renikton L Tongkhar, hei emlang u Montri ka chnat pynroi sor, u Sñiawbhalang Dhar, u MLA ka Jowai, u Wailadmiki Shylla, ki MDC ka JHADC wa kiwi kiwi.
Kani ka Scheme da mang poisa T.15.41 klur heiwa i kreh toh u sdang i nadooh ka 6 Naisan 2003 lyngba ka NLCPR heiwa neiliang u Executive Engineer ka PHE Electrical Division, u Paul Synnah da khana u ya ka parom wa yatoh wa kani ka Scheme nadooh wa sdang ya ka deiwa e khublei ya ki Montri warim ka sorkar nadooh u Singh Mulieh, u Dr. RC Laloo wa kamjooh leh ya u MLA ka Jowai wa katni uwa da booddien ya kani ka kreh.
Da khana u leh chaphang ka Mihmyntdu Water Supply Scheme ya ka wow saam um cha ki manyung ka Mihmyntdu na ka Wah Sakti heiwa da mang wow pynlut hadooh T. 32 klur heiwa ya u mooyurim leh da booh ha kani ka sngi.
U Chief Engineer ka PHE, u CR Challam hawa e yei klam da ong u wa ki kor (Pump Set) wow taan um ha kani ka thaw ha Oorkhla toh kiwa da rim wei emkaam wow yoh ya ki kor wa thymme heiwa da yoh ya ka poisa kamwa T. 4.48 klur tam wow kylliang ya ki kor heiwa daw pyndep u pyndait ya ki hapoh 6 bnai.
Da khana u leh ya i emkaam wow pyndait ya ki Micro Processor khnang wow lait u thut i saam um neidaw wa thut ka bordiñ kamwa da leh ha Tura, heiwa da yoh T. 3.72 klur wow pyndait ya kini ki tiar. Heiwa waroh ka poisa wa da yoh neibynta wow pynjanai ya i rukom saam um ha Jowai da kynjoh ko T. 8.20 klur ya kawa da yoh na ka sorkar jylla.
U Wailadmiki Shylla hawa e i klam da khana u wa u EE ka PHE, u Paul Synnah uwa da yahluti ya oo wow pyndep ya kani ka Project deiwa e khublei leh ya ki waheh chnong ka Mihmyntdu wa ka Khliehtyrchi wa da krehlang ki wow wanrah ya ki Scheme um ha kini ki ar chnong.
Da kynmoo u wa ki ar tylli ki kreh wa da boohthong u wow pyndep nadooh wa jop u kam u MLA kiwa kynthup ya kani ka Renovation of Jowai Water Supply Scheme wa ka Iawmusiang heiwa da pynsñiaw u ya i mynsien wa kmen wa da yoh wow wai ya kani ka Project ynne.
U Sniawbhalang Dhar hawa e yei klam da e khublei u ya kiwa mihkhmat warim nadooh ki MLA wa ki MDC wa da kreh ki hadooh wa poi ynne ka sngi.
“Ka Meghalaya toh ka Best State wow pynkrehkaam ya ka JJM neidaw wa krehchitom u Montri ka PHE, u Renikton Tongkhar,” da ong u Sniawbhalang Dhar.
Da khana u waka Mihmyntdu ympu toh u yoh ko ya kani ka Scheme, neibhah wa haap ko ha sor wa ha palatsor (Partly Urban & Rural) tangwa nei kreh chitom u MLA da ye u yoh ya kani ka Scheme.
U Renikton hawa e yei klam da yaroh u ya u Wailadmiki Shylla deiwa ong wa nei kreh yong oo da yoh i kyrkhu ha ki kaam pynroi hapoh ka Jowai Constituency, kyrpang da e khublei u ya ki sahep ka chnat kiwa da kreh chitom dei khmat wa soohrkhai.
Heiyatoh wa ka Scheme ha Khliehtyrchi da khana u wa da mang T. 24 klur tam katwa ya ka Mihmyntdu won T. 32 klur tam.
“Sa kamwa 40,000 tylli ki manyung na ki 5,88,000 ki manyung ha ka jylla kiwa dang sah wow pynpoi um lyngba ka JJM,” da khana u wa hanla wan ka kjut khlam COVID-19 ka sorkar ym em u chong ko heiwa kani ka sorkar da kreh ko ya ki kaam kiwa kiwi ki sorkar tieñ ki wow leh tangwa ka sorkar MDA da raikut ko wow leh ya ki nadooh i chna ya ka yung dorbar chna aiñ wa thymme, i pynbait ya u pood wa ka Assam wa kiwi kiwi.
Chooh chooh da ong u wa i booh ya ki mooyurim booh ko hei kyrmen wa i chaniah yaka chnong, ki sahep ki chnat waka sorkar waroh kawi deiwa kyntu ya waroh wow krehlang khnang wow wanrah ya ki kaam pynroi ha ka jylla hi waroh kawi.
Kiwi kiwa da klam ha kani ka sngi kynthup ki ya u MB Rymbai uwa man u CEM warim ka JHADC uwa jooh man leh u Waheh Chnong warim ka Khliehtyrchi, ka R. Kynjing kawa man ka Executive Engineer ka PHE Electrical Division, katwa u R. Challam uwa man u SDO ka PHE Electrical Division da e u ya ki kyntien khublei.
Ya kani ka sngi da pynphooh ya ka da ki chaad wa ki rwai.
