I awri wa i kajia pood ha u Line of Actual Control (LAC) ha liang mihsngi ka Ladakh hapyrdi ki chipai ka India wa ki chipai ka China (People’s Liberation Army) dang joor i kat dang mih ki sngi wot hadien i yaklam yasuk hapyrdi ki heh chipai wa ki montri ki sorkar ri ki ar ri.
Ynne ka sngi uwa ektien ya ka PLA na Western Theater Command, u Colonel Zhang Shuili, da kam u wa ynnin i janmiet ki chipai ka Indian Army da yaleh ki wow psiah chiliang u LAC ha thaaiñ God Pao Mountain wei ki chipai ka India da sdang siat pyntieñ ki ya ki chipai ka PLA wei neiliang ki chipai ka PLA da siat kylla ki wow maham ya ki chipai ka India.
Da ong u leh wa ini i leh ki chipai ka India da tyngkheiñ i ya ki kular hapyrdi ki ar ri deiwa kyntu ya ki chipai ka India wow sangeh noh wow leh kamni neini chaphrang.
Heiyatoh wa ini ka Ministry of Defence (MoD) ka India ynne i step da pynche ko waka ri kwah ko wow wanrah yei chongsuk hapyrdi ki ar ri ha LAC tangwa ka China won pteiñ bait ko wow leh ya ki kaam ki wow pynchrai wei wow pynmih yei awri.
Ka MoD da ong ko leh wa ym em ha iwon iwon leh i por wa ki chipai ka India da lai ki cha chiliang u LAC wei wow siat suloi tangwa toh ka PLA kawa da tyngkheiñ bait ya ki kular hapyrdi ki ar liang.
Chooh chooh ka MoD da ong ko wa ynnin ka 7 tarik ki chipai ka PLA da pyrchang ki wow tia chajan i thaw wa em ki chipai ka India wei hadien wa chah beh ki (ha ki chipai Indian Army) neiliang ki chipai ka PLA da sdang siat ki kattu katni kuli wow pynchrai ya ki chipai ka India tangwa hanla kattæ leh ki chipai ka India da chimkhia ki yeini wei da wanrah biang yei suk.
Ka Indian Army u yaleh ko wow wanrah yei chongsuk wei i kam u heh chipai ka Western Theatre Command toh wow yah bakla ya ki nong China wa ka prthai waroh kawi, da ong ka MoD.
Ini i yasiat suloi ha LAC toh ka sien wa nyngkong dooh hadien kamwa 40 snem wa da rai wa ym pynemkaam ya ki suloi hapyrdi ki ar ri ha khappood.
