Shillong: Ha ka 3 tarik u Naikhynde uni u snem heipor chi waje hadooh chi waje chiteiñ i pyrdi synyaw ka Anjana Sinha (36 snem) kawa sah ha Macabbe Road, Polo kawa chong dai baam ha rood sarok Khyndailad, Police Bazar, Shillong la kamwa 12-13 snem da chah tynyap ko heiwa da em wa ah ya ka da ka tari na radang.
Ha katai ka miet u kurim ko u Suresh Sinha u wym em chait da chong yang u ka ha Khyndailad wei hadien wa ym em poi ko hadien kamwa 30 minit da lai li thooh u ka wei manda poi u hajan ka Power House wa chong dai ko da chem u ya ka Shawl wa ki slippar ko ha sarok.
Kamtæ da sdang u wow thooh ka wei kamwa 30-40 Feet na i thaw wa chong dai ko hajan ka Gate wa psiah cha Lady Keane College nadien, da chem u ya ka heiwa da chah ah ko na radang wei da em leh boon kiwi ki kha chah ah ko.
Da kit ya ka bran bran cha Civil Hospital, Shillong da ka 108 Ambulance heiwa ki Doctor da ong ki wa da khlaad ko chwa wow poi cha Hospital.
Ki pulit da chimkhia ki ya ini wei da pynman leh ya ka takit da ki dkhot ka FSL ki pulit wa ka Special Cell, East Khasi Hills Shillong. Ynnin ka 5 tarik da kem ki ya u Jacky S. Marak (21 snem) uwa na Athiabari, West Khasi Hills wei hadien wa takit ya oo da kem won sa ya u Sarmaston D. Sangma (22 snem) uwa na Dholaigaon, Mawsynram uwa kreh kam uwa chet hapoh ka Step-In Restaurant, Lachumiere, Shillong wei da kem ya oo leh na Lachumiere hi wei uni da suba toh uwa tynyap ya ka Anjana.
Ki pulit da pyntip ki wa i daw wa tynyap ya kani ka bru toh wow lute ya ka heiwa da tooh naka T. 2000 wa ya ka Mobile Phone ko. Ya ka Mobile Phone wei wa ka tari wa pynemkaam da chem won na kawi tawon ka restaurant wa tip kam ka Golden Gate Restaurant, Nongmynsong, Shillong i thaw wa jooh kreh u Sarmaston.
U Sarmaston jooh emkti u ha kiwa boon ki kaam tooh wei da dep tooh u leh na kani ka Golden Gate Restaurant.
Discussion about this post