Hadien i chah tynyap khiar u Pynkhreh Surong uwa na ka chnong Mynsngat ha ki bru chim kabu du neidaw ka kari Mahindra Pick-up wa dang dep thied thymme kamjooh leh wa rah u deilang ka poisa kamwa chi lak neibynta u thied saro, ynne ka sngi ki paidbah ka chnong Moorap da ya mih paidbah ki deilang i rah lama yong wa ki Placard yow pynyoo ka dak sñiawsih wei beiñ joor leh ya ki kaam damok ki arngut wada chah kem na kani ka chnong wa kynthup ya u Meban Talang wa u Jimmy Kyndait, kamjooh leh u Sambun Dkhar na ka chnong Mynsngat.
Neiliang kiwa yahkhmat chnong wa kynthup ya u Standly Ryngkhlem kam u waheh chnong, u Thadius Phalangki, Secretary chnong deilang wa kiwi won kiwa chong chnong da pynsñiaw ki yei sñiawsih wa mih pathan sa arngut kiwa pynyap bru hapoh chnong hadien u I Love You Talang.
Da kyntu ki ya ki paidbah wa na kiwi won ki chnong wymtoh u thaw næ kheiñ sih yaka chnong yong ki neibhah wymtoh man ki i jooh waroh wei wymtoh leh ka chnong, ka kur ka jait næ ki bei ki pa wa phah u leh ki yei kaam sih, najrong wym jooh pyrkhat ki leh u jia kam ini ha chnong yong ki kawa da pynman ya ki katni u sñiawsih lang ki kamwa sñiawsih ki paidbah ha waroh ka jylla.
“Kam ki bei ki pa da sneiñ kyntu i ya ki khon chwa u mih ki na yung wow im tipbru ki cha wa lai mylla, tangwa la artylli ki snem tyngkhooh i kam ini i eh wa ki khon ka chnong da leh ki yei sih wa khroo deiwa pynyap para bru kam ka laad kamai yong ki,” ong kawi ka manbei.
Hawa klam neiliang ka kur Talang waka kur Kyndait kani ka chnong Moorap, ki leh i jooh hi pynsñiaw lang ki i sñiawsih neibhah wym sñiawsuk ki u mih kam kini ki bru napoh ka kur ka jait.
Heijooh i por neiliang ki paidbah ka chnong Moorap waka kur Talang deilang ka kur Kyndait kyntu ki ya ki bor ka aiñ wow kset patok chi rta ya kiwa kam kini ki jaitbru khnang wa ka chnong ka thaw wa ka imlang sahlang u chngaaiñ ko.
Hadien ka yalang na Moorap ki paidbah da ya mih lai won ki chadooh chnong Mynsngat wow ya chimbynta lang haka lai paidbah wa da pynman won da ka dorbar chnong Mynsngat.
Wei kam i dak ksohkti lang ki paidbah ka chnong Mynsngat, da sakhi wa ki dukan da khang khyrdep lut waroh wei da ya chimbynta lang ha ka lai paidbah nadooh ki khynnah skur, ki seiñbhalang, kiwa yah kari, ki chnong wa marjan wa kiwi.
Kamtæ hadien wa neiliang u waheh chnong Mynsngat u Pham Pakma da pdiang burom u ya waroh kiwa wan poi cha katai ka yalang da yoh won sei klam na ki kattu katni kiwa emlang ha katai ka yalang wa kynthup na u waheh chnong ka Moorap, u waheh chnong ka Rakabah, u waheh chnong Namdong, u dkhot ka HITO Mynsngat Area, u pa yong u I Love You Talang wa u Meban Talang, u Bijoy Tariang wa kiwi de kiwa da beiñ joor wei da dawa ki ya ki bor ka aiñ u kset patok chi rta ya kiwa emkti.
