Deiwa chah khi khulooiñ wei chah thang da u sikret hei doh i pran, ki ar ngut ki khynnah da yoh ki wow liwan cha Mizoram hadien wa chah rah ki ha ka seiñ kieñ suloi ka Myanmar kiwa em ha ka Chin State heiwa da chah ksok ki da jan dap chi tayaaw, wei da pynlait ki ha ka 6 tarik uni u bnai, da pyntip u heh ka Assam Rifles.
Kini ki khynnah chynrang kiwa em 16 wa 15 snem da chah rah ki ha ka Hualngoram Unit ka Chin Defence Force (CDF), kawa man kawi na ki seiñ kieñ suloi kiwa yaleh pyrchah wa ki chipai sorkar ka Myanmar.
Da chah rah ki ha ka 1 tarik uni u bnai ha Rih Dil Lake, kawa man ka thaw uiñke suwari kawa em ha khappood ka Myanmar wa Mizoram heiwa da psiah ki cha ka chnong Rihkhawdar kawa da em hapoh Myanmar.
Kini ki khynnah wa em 5 ngut kiwa na chnong Zokhawthar wa em ha Champai District ka Mizoram, da lai ki cha Rih Dil Lake da ar tylli ki thuk-thuk wei manda poi ki ha ini i thaw da chah pynsangeh ki ha ki bru ka CDF, kiwa da dat ki neidaw wa dadep chwa ki wow dat ya uwi u dkhot ka CDF ha ka 31 tarik u Naisaphar uwa tip kam u Ram Nun Sanga uwa da chong ngiah ha rood kani ka nan.
Le ngut na kini ki san ngut ki khynnah da yoh ki wow yut katwa ki ar ngut won da chah ksoh ki ha ki CDF wei da kset ki ha kani ka thaaiñ Rih Dil kamwa ar sngi dep neitæ da kit ki cha ka Liando Camp kawa em ha chnong Seik, Myanmar ha ka 3 tarik heiwa heini da kset biang ki heiwa da chah pynchitom ki leh deiwa chah khi khulooiñ, chah thang da u sikret wei da phut leh ya ka lamieñ ki wa em nakhmat.
Da pynlait ki ha ka janmiet ka 6 tarik deiwa kyrpaad ka chnong deilang ki seiñ wa em ha Zokhawthar.
Neiliang ka Assam Rifles da ong ko wa da leh ka CDF yeini yow pynyoo bor kamjooh yow lait kiwi wow leh heh kamjooh yow pyntieñ ya kiwa yahkhmat chnong.
Kini ki CDF toh kiwa khrong dan ya ki mar ki mata kiwa mih wa psiah cha India deiwa yoh kyrchaan na ka Chin National Army (CNA).
Discussion about this post