Kiwa chong chnong wa sah ha ki chnong wa em ha khappood kiwa haap hapoh yong ka Shella Constituency da kmen ki hadien wa u Symbood Montri Rangbah ka jylla, u Prestone Tynsong uwa pait leh ya ka chnat PWD (Roads) da pynbna u wa katai ka thaaiñ daw yoh ko ya ka sarok lai kari wei kamjooh leh ka yingkieñ ka wow pyndooh noh yei eh wa boon wa da maad ki waroh chi kattu.
Ya ini da pynbna u Symbood Montri Rangbah uwa man leh u National Vice President ka National People’s Party (NPP) ha ka yalang yong ka NPP Shella kawa da pynman ha Umkhabaw yow paan kyrchaan neibnta ka kyrtong yong ka Party, ka Grace M Kharpuri.
Yow lai cha katai ka chnong wa da pynman ya ka yalang, ki kari da hap ki wow lai na ka wah bah wa na sarok khyndaw wa kynrum kynram bha, kawa ye u lai lyngba du ha i por tlang. Ha i jooh i por, u Prestone da ong u leh wa heipor wa hiar da ka Helicopter, da chynna yei miat katai ka thaw, kamtæ da ong u wa hadien wa da pyndep ya ka yingkieñ wei chna sarok, kani ka thaw daw khriñ ko wa kiwa uiñke suwari na kylleiñ kylleiñ.
U Prestone da ong u wa katni la 35 snem da e synchaar du ha kawi ka Party, kamtæ ha u 2023 toh wow pynkylla noh deiwa pynjop noh ya ka Grace kam ka MLA wei ini toh itæ i kylla.
