U Khroo L Pariat, uwa kreh mon sñiawbha wa chnong wa sah ha Tympang Iawmusiang, Jowai hawa pynsñiaw yaka RTI wa yoh u naka chnat PWD (Road) South Jowai Division Jowai, heiyatoh i chna pynmiat yaki sarok hapoh ka chnong Jowai iwa da mang heilut kamwa T. 28,80,43,810 neibynta 32.601 Km, ong u wa heiwa sdang mar ya yoh u yaka RTI phylla u wow yoo wa wot hawa da mang chna yow sarok hei rben wa 30mm leh tangwa yaki dooid wow kai um won wym em mang u chna.
Da ong u i thmu wow chna pynmiat yaki sarok deiwa siang psiang hi-eh ha waroh ka chnong Jowai khlem i tih, wei khlem em ki dooid daw smat sih u sarok manda yoh ka um u kai heipor slap.
Deiwa e nongmuna u leh ya kiwa boon ki sarok wa sih wot hadooh ki National Highway i daw hi toh wym biang ki dooid, wa hanla rben i siang psiang leh tang neidaw wym em thaw kai um da pynman noh u smat sih ki sarok.
Hajrong ini da pynrap won u wa du hadien ar tayaw wa yoh RTI u, neiliang ka yung krehkaam u SDO Asst. Executive Engineer Jowai Urban da sdang tympra wei chna dooid noh ki hanla haka RTI wym em paaw wa daw chna dooid.
Han kattæ leh da pynbaad u wa ini toh i chna tangdep donhi neibhah wa waroh ki dooid man kiwa rim wei da pra, wei jooh yoo leh manda joor u slap pdung ki dooid kamjooh dap um ki sarok.
Wei neini i rukom chna dooid em leh ki bynta wa ye u ktah yei lai i wan ki bru neibhah u sarok najrong wa khian da nang khian chooh chooh.
Heiyatoh wa kani ka kreh da pynkynmoo haroh u wa katkam i por wa booh toh u dep hapoh 3 snem.
Neitæ i heh u sarok won toh kamwa da man hi cha waroh ki 57 tylli ki dong nadooh ki sarok heh (Main Road) waki sarok poh dong (Internal Road).
Ha kani ka sngi da booh yukylli haroh u wa ileh ma-ai myllien u chna surok du manda jan Election donhi, wei kani jia ko nadooh ki snem nachwa wot hadooh katni.
