Ka yung bichaar Meghalaya High Court ha ka 18 tarik uni u bnai lyngba ka dorkhat (Affidavit) na u Chief Engineer (PWD) (Roads) da ong wa ka chnat PWD(R), da pynlait ko ya ki Work Order hapoh ka “TEMPORARY RESTORATION of RYMBAI BATAW BORKHAT SONAPUR ROAD” ha i lut wa T. 74,33,000.
Hapoh ini i kreh daw chna ya u sarok khyndaw wa chipor (Temporary) wow lai kari katwa dang yang ya ka poisa na ka DoNER Ministry neibynta ka Rymbai-Bataw-Borkhat-Sonapur (RBBS Project) wa palat T. 130 klur.
Neiliang ka High Court (HC) da sñiawkhia ko hajrong i pynslem na ka NEC wa DoNER Ministry wow pyntip hajrong i man i long yong i kreh ya u sarok cha ki chnong Hingaria, Huroi, Lahalein wa Lejri.
Ka HC da phah ko ya u Secretary DoNER, Govt. of India wow pynche ha kani ka 23 tarik yei daw wa slem wow chna ya u sarok wei kammon man i kreh katni.
U Raja L Suchen uwa man kam u Secretary ka JAC ka Dorbar Chnong Hingaria, Huroi, Lahalein wa Lejri da pynsñiaw u yei kmen hajrong i kreh wa daw sdang ka sorkar jylla i wow yarap ya ki paidbah ha kiwa boon ki liang khamtam chwa wow poi u slap deiwa kyrmen leh wow chna miat ya uni u sarok hanla man u uwa chipor donhi.
