Hadien wa mih i chah pynmynsoo ki bru Khasi, Pnar wa Garo ha ki kattu katni tylli ki chong hapoh Moulvibazar District ka ri Bangladesh ha kini ki tayaw wa dadep, ynne ka sngi dei mynsien pyrchah ya ini i chah thombor da pynman ya ka yakhih wa tip kam ma ‘Human Chain Protest’ ha Press Club Chattar, Moulvibazar ya kawa da pynman da ki seiñ Ri-loom wa sah hapoh Sylhet Division.
Ha kani ka yakhih ynne ka sngi da chimbynta da kiwa boon ki seiñ na ri Bangladesh kam ka Khasi Social Council, ka Khasi Co-operative Society, ka Bangladesh Advasi Forum wa kiwi kiwi.
Heipor wa pynman ya kani ka yakhih Human Chain da yoh yei klam na kiwa kitkaam ki seiñ wa chimbynta ha kani ka yakhih heiwa da beiñ joor ki yeiwa jia i chah thombor ki khian paaid (Minority) kam ha kani ka kynti wei da dawa leh wa ymtoh u chah beh ki na ki thaw wa da imja ki da ki spah snem kattu.
Hadien ini da lai e dorkhat ki ha u Deputy Commissioner ka Moulvibazar wei neiliang yong oo da kular u wow chimkhia yeini i kaam wei wow e sonteri ya ki paidbah ha ki chnong wa chah ktah.
Chooh chooh neiliang u DC da kular u leh wa hapoh chi tayaw daw phah lai sylli (Enquiry) u chirup wa u SP cha ki chnong wa chah ktah wow tip tre yeiwa jia wei wow leh yeiwa emkaam.
Hawa yaklam wa ki kattu katni ngut ki paidbah na ki chnong ka Moulvibazar da ong ki wa i man i long da man i iwa jai jai wei ki pulit leh da wan sonteri ki neipor cheipor hapoh ki chnong.
Kam wow pynkynmoo heini, hadien wa e hukum ka Kasari (Court) hajrong ki thaw wa rep kwai, rep pathi ki Khasi Pnar ha ki kattu katni chnong da poi won i kaam chadooh i ya mynsoo wa i chah pam ki tre pathi tre kwai ki tre chnong Khasi Pnar ha ki bru wa suba toh ki Dkhar Bangla.
Puræ leh: Mynsoo kamwa 10 ngut ki Khasi Pnar wa chah thombor ha ki nong Bangladesh
