Jowai: Kam chibynta wow pynneh pynsah ya ka rymaw kamjooh yow pynduna ya ka la-ær wa tngit, ka Meghalaya Cement Limited kawa tip leh kam ka Topcem Cement kawa em ha ka chnong Chiehruphi East Jaiñtia Hills District da pynman ko ya ka tamasa thung dieñ hapoh ka pchem yong kani ka karkhana pynmih khyndawbilat.
Ha kani ka thung dieñ da wan chim bynta lang ki dkhot ka CRP hapoh i yahkhmat u Asst. Comandant u Jogesh Kumar wa u Sub-Inspector Suresh Paswan, ki wakreh ka Topcem Cement hapoh i yahkhmat ki heh ka Company wa kynthup ya u G.S. Sodhi, S.K.Rai, S.K.Sinha, Rajes Ranjan, S.K Singh wa kiwi kiwi hei emlang ki khynnah school kiwa sikai wa ka ki manbei hapoh ka lama yong ka Ekta Club (Ladies Club).
Ya katai ka rukom thung dieñ ha katai ka thaw da leh katkam ka rukom thung dieñ ki wa ha ri Japan kawa da tip kam ka “Akira Miyawaki Method” deiwa yah u Dr. Santanu Kumar Dutta, Senior Environment Engineer, Central Pollution Board, Ministry of Environment.
Ha kani ka sngi ka 12 tarik da thung kamwa 12,500 tylli ki tre dieñ wa kamwa 53 tylli ki jait dieñ.
Discussion about this post