Ynne ka sngi da pynkup burom ya ki khynnah wa da leh bha ha ki Exam yong ki na thaaiñ Amlarem Legislative Assembly Constituency ha ka yalang wa da pynman ha Ka Syiem Jingsuk Hall, Amlarem wei da pynlai ya ka da u Daniel Khongsit uwa man u President ka Synjuk Waheh Chnong War Jaiñtia.
Ha kani ka sngi da emlang u Bayar Kupar Lyngwa uwa man kam u PCCF & HoFF, ka Idashisha Nongrang ka Addl. DGP, u Lahkmen Rymbui, u MLA ka thaaiñ uwa man leh u Montri ka sorkar jylla, u Abhilash Baranwal, SDO (Civil) Amlarem Sub-Division wa kiwi kiwi.
Ha kani ka sngi da yoh ya i klam pdiang burom na u S. Ryndang wei neiliang ka Idashisha Nongrang da e khublei ko ya ki khynnah wa da pynkup burom ha kani ka sngi wei da ong ko wa emkaam wow em ka thong wa i thrang mynsien wow man kiwa jop.
Chooh chooh da kdaw ko wa katni da joor bha i yakhun namo ka Competition wei emkaam wow raikut wow yakhun neibhah ymtoh de man i kam ha ki por wa nachwa.
U Bayar Kupar Lyngwa hawa e yei klam da ekhublei wei da yaroh u ya ki khynnah neibhah wa da lehbha ki hapyrdi wa wan ka khlam COVID-19 nadooh u 2020 heiwa da chah hikai ki toh du lyngba ki Online Class donhi.
Da ong u wa hanla ymyoh kamwa mut ymtoh u dooh mynsien ki tangwa emkaam wow man kiwa raikut wow yaleh wei wow minot sam chaphrang.
Kam u Montri ka sorkar jylla wa u MLA ka thaaiñ, u Lahkmen Rymbui hawa e yei klam da ong u wa kam ki khynnah ym em iwon iwon i duna heiwa ki khynnah em ki ka sap wei kani toh ka kaam wa dang sdang.
Da pynsñiaw u yei sñiawkhia yeiwa ym em de kiwa yoh man kam ki IAS, IFS wa IPS napoh ka jylla wa napoh ka War Jaiñtia heiwa da e nongmuna u wa ki kaam MCS wa MPS man ki kam ki chrot yong i synchaar tæ neiyi i daw wym em kiwa yoh u man.
Chooh chooh da ong u wa emkaam ya ka thong wa ha khlieh dooh wei hanlada ympoi heitæ leh daw yoh u poi ha iwa ar weiwa ka sorkar emkaam ko ya ki khynnah katni neibhah ka sorkar da wailaad ko ya ki khynnah heiwa da phah ya kiwa boon wow chah hikai ki ha ki kattu katni ki thaw wei wot cha baar leh.
Heijooh i por da ong u wa ym emkaam wow e daw deitu deini tangwa emkaam wow em i mynsien wa minot wei da e nongmuna u ya ki kattu katni kiwa da poi cha ka thong.
Ha kani ka sngi da yoh ya i klam na u Fr. G. Shangpliang uwa man u Parish Priest, na u Dimanheithmu Gayang, wei da pynkut ya ka da ki kyntien khublei na u K. Pohsna wei waroh ki khynnah wa da chah pynkup burom em ki 128 ngut.
Ya u Dimanheithmu Gayang uwa yoh Top 10 ha ka HSSLC (Science) da e ka Momento wa ka song poisa wa T. 10,000; ya kiwa yoh 90% chajrong da e da ka Momento wa ka song poisa T. 5,000 katwa kiwa yoh 80℅ tam won da yoh ki ya ka Momento wa ka song poisa wa T. 4,500.
