Ynne ka sngi ki bor District ka West Jaiñtia Hills hapoh i yahkhmat u Deputy Commissioner, u Garod LSN Dykes da lai sylli ki ya ki rood yong ka Wah Myntdu wa em ha Chahtngit hajan ka Yingkieñ Myntdu wow chem ya ki yung kiwa da chna pyrchah ya ka aiñ wei katkam ka hukum na ka NGT.
Kam wow kdaw heini, ka JHADC ha ka 10 Khonchonglad 2020 da pynmih ko ya ka hukum wa da khang wow chna ya kiwon kiwon ki jait chna lada i yung næ kiwi kiwi hapoh i jngai wa 50 meter narood ka wah hapoh u pood ka Council iwa kynthup leh ya ka Wah Myntdu.
Kamjooh leh da em ka mukotduma wa da ujor da u Sajay Laloo ha NGT ha ka 24 Naichiphaw 2016 heiyatoh wow yada ya ka Wah Myntdu.
Kamtæ hawa yaklam wa u DC ka District, u Garod LSN Dykes da pyntip u wa ynne ka sngi da pynman noh ya i sylli ya i rood yong ka wah ha Yingkieñ Myntdu katkam ka hukum yong kani ka mukotduma heiwa ka sorkar leh da phah ko wow lai sylli u Deputy Commissioner ya ki rood kani ka wah khamtam hajan Jowai.
Chooh chooh da ong u wa yeini da pynchong katkam ka hukum ka JHADC wow khang ya iwon iwon i jait kreh lada iwa skem pura namo iwa chipor (Permanent or Temporary) harood ka wah.
Da pyntip u leh wa lada chem wa ki yung man ki pyrchah ya ka hukum ka NGT waka JHADC daw thoh cha ki heiwa daw emkaam ki wow jubab neiyi i daw wym sliah ki ya kini ki yung næ ki kreh.
Hawa kylli katwon tylli ki yung wa da chem wa man pyrchah ya ka aiñ, da pyntip u wa hapoh ka Jowai Master Plan yong ka chnat pynroi sor, dadep thoh cha ki 5 tylli ki yung, da chem leh wa em 8 tylli cha baar ka Plan wei iwi iwa dang chna iwa yoodur wow man iwa chipor wei ye i leh wow man iwa neh pura.
Hajrong i chem yong ki ynne, da pyntip u wa da rai wow thoh biang cha kini ki yung wa dadep thoh kam wow pynkynmoo ya ki kamjooh leh kiwi ki yung kiwa dang chem thymme.
