Jowai: Ka West Jaiñtia District Legal Service Authority, deiwa ya krehlang waka yung krehkaam u District Medical & Health Officer, WJH da pynman ki ya ka yalang pynsñiawthooh paidbah chaphang ka Poverty Alleviation Scheme ka wow yarap ya kiwa dooh wa duk wow pynku yei yoh i kot yong ki wei da pyman leh yaka Health Mela namo ka e sumaar mynkna ha chong Iooksi ha madan bol Mooblang hajrong ka phang “Universal Health Coverage” haka 5 tarik uni u bnai.
Ya ka yalang da pynlai da u Secretary ka District Legal Service Authority, West Jaiñtia Hills District u D.S. Marbaniang uwa da pynche paidbah leh ya i thmu kani ka sngi wow pynsñiaw thooh paidbah yaka Poverty Alleviation Scheme kawa krehkaam ha waroh ki District kawa daw e myntoi ya waroh.
U Dr. K.C Ajar, District Medical Health Officer ka WJH da ong u wa kani ka Health Mela da pynman wow e yarap hei yatoh waka chait ka khiah ki 20 tylli ki chnong wa em chajan deiwa kyntu leh ya ki paidbah wow chim kabu ki ya kani ka e sumaar wa mynkna.
Kiwi de kiwa klam ha kani ka sngi toh ka Dr. H. Uriah, ka Dr. J.N Shullai, ki dkhot ka DLSA, Jowai, u Dolloi ka Raliang Elaka u C. Lyngdoh wa u waheh chnong ka Iooksi u C. Tangliang wei da emlang leh u District Session Judge u E. Kharumnuid.
Ki Doctor kiwa wan ha kani ka sngi toh naka yung krehkaam u District Medical & Health Officer wa na Jowai Civil Hospital, Ialong heiwa da e leh ya ki dawai mynkna cha kiwa wan chah summar.
Ki jait Doctor kiwa wan toh kiwa da pynliah haka Obstetric & Gynecologist, Pediatrician, Medicine, Eye, ENT, Dentist wa ki Doctor AYUSH.
Waroh ki bru wa da yoh mynoti da poi ki 1333 ngut.
Discussion about this post