I kynaad da mih i ha khappood Assam-Nagaland hadien wa ki jaitbru Naga da ksoh ki ya ki 16 ngut ki pulit Assam hadooh 15 kynta wei ini jia i hadien wa lai kynreh ki pulit ya ki thaw deiwa kdong ki ya kiwa emkti ha i tooh kari ha khappood tangwa da bakla luti ki wei da poi ki ha Mokokchung District ka jylla Nagaland.
Kini ki pulit toh kiwa da yahkhmat da u Police Officer In-charge ka Selenghat Police Post, u Jatin Bora wa u In-charge ka Teok Police Station, u Ganga Phukan.
Manda poi ha iwi i chnong ha Mokokchung, ki tre chnong da suba sih ki ya kini ki pulit wei da hiar thma ki ya ki pulit da ki tari wa ki tiar wa nep heiwa uwi u pulit wa tip kam u Vidyut Das na ka 11 APBN da mynsoo joor u wei da kit ya oo cha Assam Medical College ha Dibrugarh.
Kini ki pulit da chah ksoh ki hadooh 15 kynta chwa wow pynlait ya ki hadien i yaklam u Additional Superintendent of Police, u Luna Sonowal na ka Jorhat District wa ki heh pulit na ka Mokokchung District.
Discussion about this post