Hadooh 150 tylli ki masi wa wan yakhun ha ka Tamasa Yadaw Masi Rong ha Mynsngat

Ka Tamasa Yadaw Masi Rong wa jooh pynman chisien chisnem ha chnong Mynsngat, West Jaiñtia Hills District kamwa da sikai pynjooh da ki waheh wasian hadien wa pyndep yei rep, ha uni u snem da man ka sien wa 57 wa da pynman ya ka ynne ka sngi hei wan sakhilang u Symbood Montri Rangbah ka jylla u Sniawbhalang Dhar uwa man leh u MLA ka thaaiñ, neitæ ki bru waheh wasian ka chnong ka thaaiñ wa ki paidbah na kylleiñ kylleiñ.

Ha ka yalang tbian wa pynlai da u Healing Mukhim, uwi na ki waheh ka chnong, u Lieh Sungoh da khana u wa ki bru ha kani ka chnong sñiawsuk bha ki u ri masi yow pynheh pynsngaid khnang wa manda poi i por yadaw rong yow yoh pynhiar madan ya ki masi.

Wei nadooh nachwa hadooh katni leh kiwa chong chnong kmen ka’it bha ki u poi kani ka sngi heiwa da yakhun ki u pyndep smat yei rep i riang, khnang yow yoh sakhi ya kani ka tamasa kamjooh leh u pynkmen ya ki khon ki kti.

U Sñiawbhalang Dhar hawa klam kam u kongsan da yaroh u ya ka chnong Mynsngat wa ye ko u pynneh pynsah ya kani ka tamasa kawa heh kawa da sikai nadooh warim.

Sñiawngooh u leh ya ki tre masi wa chimbynta wa toh lyngba yong ki da man ka sngi kawa jop, neibhah lada kyruiñ cha ki khusnaam man ki kiwa khian bha u yoh ki.

Kamtæ i bien ki u chimbynta man ko ka nongmuna ya kiwi tawon ki chnong wym wow ang ware yei yoh nong, tangwa toh u ang yei burom ka chnong dei wow man kiwa yatylli.

Chooh chooh ong u kani toh ka Sports yong ki mrad heiwa daw em kiwa jop wa kiwa rem, kiwa jop nang kmen, kiwa rem won nang yaleh u e baam chooh chooh ya ki masi khnang yow yoh i jop mynried snem won.

Ha kani ka Yadaw Masi Rong da em leh deilang ka yaaw ya dai ya thied wa boonjait kawa man du chisngi donhi, kamjooh ki jait lehke pynwyrngia waphær waphær, wei ki paidbah wa poi cha kani ka tamasa toh kiwa da wan na kylleiñ ki chnong ki thaw.

Ha kani ka Yadaw Masi Rong da em hadooh kamwa 75 jur ki masi wa da wan chimbynta iwa mut wa em 150 tylli ki masi waroh, wei da bhah ya ki ha ki le Group wa kynthup ya Group A, B wa C.

Ha ka Group A toh ki masi heh, Group B ki masi wa man pyrdi i heh, Group C won toh ki masi wa rap khian.

Kam chibynta wow wow rap chongchit chooh chooh kani ka Tamasa Yadaw Masi da e laad leh u chimbynta 8 tylli ki masi na baar kiwa da bna naam bha.