Shillong: Ka sorkar jylla da booh thong ko wow e myntoi ko hadooh 4 lak tam ki manyung wow yoh yarap na ka scheme chah sumaar kjut kawa tip kam ka Megha Health Insurance Scheme (MHIS-III) ha ka jylla.
Wow pynmankaam yeini i thmu ynne ka sngi ka Meghalaya State Planning Board (MSPB) da phah pynche ko ya ki sahep ka tnat i chait i khiah hajrong i rukom pynkhreh neibynta ka bhah wa le yong kani ka scheme.
Hawa yaklam wa kiwa thoh khubor, u Co-Chairman ka Board, u John F. Kharshiing da ong u wa katkam wa pynche ki sahep ka tnat, da booh thong wow sdang wow thap pyrtuid ya ki manyung nadooh u Naiynru (June) hadooh u Naichiphaw (October), wa mut soo bnai ha waroh kawi ka jylla.
Katkam i ong u John kawi ka Smart Card u krehkaam ko hadooh san ngut kawi ka manyung wei lada em palat san ngut won daw e sa kawi ka Card.
Ka Board da phah ko ya ka tnat wa pait yei chait i khiah wow pynkyllooid ko ya ki kyndon ha i rukom wow pynkrehkaam ko neibhah wa boonsien ki nongkyndong manda wan ki cha ki thaw sumaar ye ki u mylliñ wow rah ya ka Smart Card katwa kamtæ dooh yarap ki na kani ka scheme neibhah ki thaw sumaar ym pdiang de ki ya ki.
Da khana u wa da tipmit ya kamwa 150 tylli ki thaw sumaar nadooh ki yong ka sorkar kamjooh ki yong ki bru samen (Private) kiwa em ha kani ka jylla wei kiwa em cha baar ka jylla kiwa da pdiang ya ka Smart Card yong ki bru na kani ka jylla.
Khaddooh da ong u wa kani ka scheme toh kawa nyngkong dooh ha India kawa kdung ya waroh kiwa chongchnong khlem da pait chilliang na uwa yoh ha kiwa dooh.
Discussion about this post