Ynne ka sngi, ka Kyrmen Foundation da pynman ko ya ka yalang wa kyrpang wow pynsñiawthooh yei emkaam i e snaam sñiawbha namo ka Awareness Programme cum 1st Blood Donation Camp ha Tep Kyndait Govt. UP School wa Tep Kyndait Government UP School wa Seiñjait Tuber Higher Secondary School, Tuber Kmaichnong heiwa u Montri ka chnat bhalang ka jylla uwa man leh u MLA ka Khliehriat, u Kyrmen Shylla da man u kam u kongsan hei emlang u DC ka East Jaiñtia Hills u A. Baranwal.
Ya kani ka e snaam sñiawbha da pynman leh hei yakrehlang wa ka Ai Jingim, Shillong wa ka Seng Samla Katholic Mihmyntdu heiwa da pynman ya ka kam chibynta yong ka World Blood Donors Day kawa toh u man ha ka 14 tarik uni u bnai.
U F. Dkhar uwa man u President ka Kyrmen Foundation da e khublei u ya u Kyrmen Shylla uwa da kyrchaan bha ya ka seiñ heiwa da khana u wa iwi na ki kaam wa pynman ya kani ka e snaam sñiawbha toh wa ka Foundation em ko i bynta wow kreh ha i chait i khiah wei ynne da pynman noh ya kani ka e snaam neibhah wa pynim i ya ki bru.
Ka In-charge yong ka Jowai Blood Bank, ka Dr. P. Shylla hawa e yei klam da ong ko wa i snaam wymye wow chna ha ki karkhana kam ki dawai kamtæ emkaam ya i snaam wow e na ki bru, deiwa pynrap wa em ki kjut kiwa ymye wow pynchait da ki dawai tangwa dei snaam kamtæ da kyntu ko ya ki bru wow wan chaphrang wow e snaam deiwa kheiñ burom salonsar ya kiwi ki bru.
Da khana ko wa boon ki bru wa ye wow e snaam nadooh wa dap 18 snem chajrong lada ki chynrang næ kynthai heiwa ki chynrang ye ki wow e snaam man ka le bnai wei da khana ko kammon wei kiyi wa ye wow e snaam kamjooh leh kiwi ki bynta wa yatoh wa i snaam.
U A. Baranwal hawa e yei klam da yaroh u ya ka Kyrmen Foundation kawa da leh chiboon ki kaam khamtam ynne ka sngi wa da pynman ko ya u e snaam sñiawbha.
Da ong u wa toh i kaamram wow e snaam neibhah i e snaam pynwiar u ya i sñiaw yaphær neibhah ymtip yi wow myntoi na i snaam wa e, ye i wow man ya kiwa phær ka niam, phær ka jaitbru wa kiwi kiwi.
Neiliang u Kyrmen Shylla da ong u wa dap u dei mynsien wa kmen wow yoo yei wan ki bru chaphrang wow e yeiwa kordor bha ha i doh i pran wei itæ toh i snaam.
Da ngait skem u wa daw em kiwa yoh myntoi bha na ini i snaam wa e ynne ka sngi neibhah wa ye i wow yarap ya kiwi ki bru kiwa emkaam yei snaam kiwa em hapyrdi i kjut i chitom ha ki thaw sumaar.
Ha ka yalang yong kani ka sngi da yoh leh yei klam pdiang burom na ka Secretary ka seiñ, ka Simi Khongthiang, i klam na u DMHO u Dr. D. Shylla, u MDC ka Tuber u Lasky Rymbai, u Waheh Chnong ka Tuber Kmaichnong, u Miki Lyngdoh wa ki kyntien khublei na u Serious Dkhar uwa man u dkhot ka seiñ.
Ha kani ka sngi da em 23 ngut kiwa da tyrwa wow e snaam wei na kini da ye wow e da ki 17 ngut.
