Jowai: Ka Exam matric namo ka Secondary School Leaving Certificate (SSLC) wa da sdang ha waroh ka jylla ynne ka sngi wa pynman da ka MBOSE, ha ki 5 tylli ki thaw thoh Exam hapoh ka chnong Jowai waroh da em 1751 kiwa wan thoh Exam.
Ha Jowai ki thaw thoh Exam da yabhah kamni ka Jowai-1, Jowai-2 waka Jowai-3 heiwa hapoh ka Jowai-1 won da yabhah biang saka Sector-A waka Sector-B.
Ka Sector-A toh ka Government Boys’ Higher Secondary School Jowai heiwa waroh kiwa wan thoh Exam da em ki 486 ngut na ki 14 tylli ki skur deilang wa kiwa yaleh Private wa kiwa yaleh Compartmental.
Ha kani ka Sector-A 56 ngut toh ki chynrang wa 430 ngut ki kynthai.
Ha ka Sector-B won kawa man ka Government Girls’ Higher Secondary da em du ki chynrang donhi heiwa da poi ki 303 ngut na ki 11 tylli ki skur wei ym em kiwa yaleh Private.
Ha ka Jowai-2 won kawa yabhah ha ka Sector-A kawa haap hapoh ka Marianhill Higher Secondary School, Jowai waroh kiwa wan thoh Exam da em ki 372 ngut heiwa 157 ngut toh ki kynthai wa 170 ngut ki chynrang na ki 6 tylli ki skur wa kiwa yaleh Private.
Ha ka Sector-B ka Jowai-2 wa haap hapoh ka H.K. Singh Memorial Secondary School, Jowai da em waroh 310 ngut heiwa 182 ngut toh ki kynthai wa 128 ngut toh ki chynrang na ki 11 tylli ki skur khlem em kiwa yaleh Private.
Ha ka Jowai-3 won kawa haap hapoh ka KJP Synod Higher Secondary School waroh kiwa wan thoh Exam da em ki 325 ngut na ki 9 tylli ki skur wa kiwa yaleh Private.
Ki chynrang da em ki 95 ngut katwa ki kynthai da em ki 230 ngut.
Kamtæ waroh ki chynrang da poi ki 752 ngut katwa ki kynthai da poi ki 1003 ngut.
Ha Marianhill Higher Secondary School won ym em yoh yukheiñ katwon em ki chynrang wa ki kynthai wa yaleh Private tangwa waroh da em ki 53 ngut.
Discussion about this post