Ynne ka sngi da e hadooh 200 tylli ki tiar yarap (Aids and Appliances) kiwa kynjoh dor T. 11,89,407 lyngba ka ADIP Scheme cha ki bru wa kyrpang (wa em i duna ha ki bynta i doh i pran yong ki) namo ki Persons with Disabilities (PWDs) kiwa na East Jaiñtia Hills District ha Jaiñtia Eastern College Campus, Khliehriat.
Ya ka yalang da pynman da ka Pt. Deendayal Upadhyaya National Institute for Persons with Physical Disabilities (Divyangjan), New Delhi chirup wa ka SAKSHAM lyngba ka Ministry of Social Justice and Empowerment, ka chnat Empowerment of Persons with Disabilities (Divyangjan), National Institute For Locomotor Disabilities (Divyangjan), Kolkata wa ki yung krehkaam u napoh East Jaiñtia Hills wa kynthup ya ka yung krehkaam u Deputy Commissioner, ka District Social Welfare Officer wa ka Kyrmen Foundation.
Ha kani ka sngi neiliang u Montri ka chnat bhalang ka jylla, u Kyrmen Shylla da man u kam u kongsan hei emlang u Deputy Commissioner ka District, u Abhilash Baranwal, u Superintendent of Police, u Jagpal Singh Dhanoa wa kiwi kiwi.
U Kyrmen Shylla, hawa e yei klam da yaroh u ya ka yung krehkaam u Deputy Commissioner wa ka District Social Welfare Office wa da chimkhia ki wow pynman kam kani ka yalang ya kini ki bru wa kyrpang. Da e khublei u leh ya ki sahep ka National Institute for Locomotor Disabilities (Divyangjan), Kolkata wa da wan ki ynne wow saam ya kini ki tiar.
Hawa e yei klam leh, u Kyrmen da ong u wa ki bru wa kyrpang toh u burom ya ki salonsar kam kiwi tawon kiwa dap wa biang wei ka sorkar jylla lyngba ka chnat yong oo da yaleh ko wow kyrchaan ya ki nadooh ka bai baam tymmen wa kiwi kiwi lyngba ka Chief Minister’s Social Assistance Scheme (CMSAS) wei da kular u leh wa waroh kiwa da tipmit ka sorkar daw yoh yarap ki na ka sorkar.
U Abhilash Baranwal da ong u wa ki sahep yong oo chirup wa ka District Social Welfare Officer, da pynman ki ya ka Census wow chem ya kiwa man kyrpang ha ka District wei ya ini da leh da ki Community Based Rehabilitation Workers (CBRWs) wa ki Multipurpose Rehabilitation Workers (MRWs) hapoh i yahkhmat ka District Social Welfare Officer heiwa hadooh katni dadep sorjamin hadooh 122 tylli ki chnong heiwa da chem 872 ngut ki bru kiwa em i duna wei dang em leh chiboon ki chnong kiwa daw sorjamin.
Da pyntip u leh wa daw pynman ya ki Camp wa kyrpang ha ki 10 thaw wa daw jied heiwa daw e pyndep ya ki UDID Card/Disability Certificates cha kiwa em hok wow yoh myntoi, heiwa ka CM Special Assistance Programme and Pension for the Disabled leh daw pynkrehkaam ya ka ha kini ki Camp.
Hajrong ka District Policy on Persons with Disabilities, u DC ka District da ong u wa ya kani ka Policy da chna khnang wow pyntikna wa hanla kylla ki bor District, ki kyndon krehkaam u pteiñ ki khnang wa ym sangeh i chakri ya ki bru wa toh u yoh myntoi.
Ha kani ka sngi u Kyrmen da sdang u ya ka District Policy on Persons with Disabilities wow pyntikna wa yoh ki bru wa kyrpang yoh ki yei hok yong ki kamjooh leh wow kyrchaan ya ki.
Da saam leh cha ki bru wa toh u yoh myntoi da ki tiar kam ki Tricycles, Wheel Chair, Artificial limbs, Hearing Aids, Auxiliary Crutches, Walker, CP Chairs, Smart Cane Sensors wa kiwi kiwi.
Kiwi kiwa da klam ha kani ka sngi kynthup ki ya u L. Rymbai, MDC ka Tuber Constituency uwa man leh u Deputy Chief Executive Member ka JHADC, ka R. Passah, District Social Welfare Officer wa kiwi kiwi.
